Hää lugõja ja kirotaja! Kuulutami vällä Uma Lehe 18. jutuvõistlusõ.
Ku teil om rahvalõ kõnõlda mõni põnnõv, lustilinõ vai hallus õkva elost peri jutt, saatkõ tuu Uma Lehe jutuvõistlusõlõ. Parõmbidõ kirätükke autori saava avvohinna ja hää jutu trükümi 2022. aastaga joosul lehen är.
Võistlusjuttõ sordi:
1. Periselt elon juhtunu nal’alinõ vai tõsinõ lugu
Lugu, miä om olnu kas nal’alinõ, oppusõga, saatuslik vai muido ummamuudu. Võinu olla periselt sündünü.
2. Lugu, midä periselt es juhtu
Mõnõ luu omma tegünü inemise pää seen: nättü unõn vai mõtõldu edesi määndsestki juhtunust as’ast, kuimuudu olõs võinu olla. Mõnikõrd ei saaki periselt arvo, om taa lugu juhtunu vai vällä mõtõldu. A lugu om jo iks olõman, kasvai kirotaja pää seen. Peräkõrd om hää lugu?
3. Lugõma opmisõ vaiv
Oodami juttõ tuust, määndse vipõrusõ omma olnu lugõma opmisõ man. Mi kõik tiiämi luku, kuis poiskõnõ viir aabitsast tähti: N-U-G-A ja vastas pildi perrä iks: VÄITS.
Tan või kirota ka võro keelen lugõma opmisõst, näütüses kuimuudu Uma Leht om uman keelen lugõma opanu. Ja või olla juttõ ka tuust, määne om olnu taa vaiva palk, määnest rõõmu lugõminõ om paknu.
4. Nigu mõtsa hõikat, nii vasta kostus
Kirota või nii mõtsast ku ka mõistu tuust, midä seo vanasõna meile oppas.
Teema omgi vällä paknu Eesti Rahvaluulõ Arhiiv.
Inne luu kirotamist lugõgõ läbi seo oppus:
Egä inemine või saata võistlusõlõ kooni viis juttu. Jutt piät olõma kirotaja hindä luudu ja tuu ei või olla inne mõnõn tõsõn lehen vai raamatun är trükit ega internetti üles pant. Lugu võinu olla mõistligu pikkusõga, mitte pikemb ku üts arvudilehekülg (3500 tähemärki, 700 sõnna). A või ka lühembä jutu kirota.
Ku pään om hää jutt, a saa-i vai mõista-i taad kirja panda, sis kõlistagõ tel 782 2221 vai 5692 2841. Märgimi vällä, kuimuudu lugu iks kirja saanu.
Egä jutu mano kirotagõ kimmähe uma nimi, aadrõs ja telehvoninummõr! Ku tahati, et lehen trükitäsi ti tõnõ (vällämõtõld) nimi, kirotagõ tuu suuv eräle luu lõppu.
Jutuvõistlusõlõ saatmisõga and autor Umalõ Lehele õigusõ juttu lühendä, toimõnda ja tuud lehen ja internetin avalda.
Oodami juttõ nikani ku 22.11.2021. Jutu pallõmi saata e-kiräga info@umaleht.ee pääle vai postiga Uma Leht, Tarto 48, 65609 Võro liin. Tunnissõna: jutuvõistlus.
Parõmbidõ juttõ kirotaja saava preemiä. Kõik kirotaja saava tenotähes tulõva aasta Võro-Seto tähtraamadu.
Terävät sulgõ!
