Rahha vai rahhu?
Ma kuuli raadiost, et joba mito aastat muutva maailma kõrraldust nii väiko as’a, midä silmäga olõ-i nätäki. Ku kats aastat oll’ tuu väiku tegeläne koroonaviirus, sõs parhilla om tuu Vinne gaasimolõkul, kiä meid rahuh ei lasõ olla. Tuhandit kilomiitrit om torrõ, midä müüdä and tuud molõkuli takah otsi.
Noid gaasimolõkulõ ollõv kõgõ rohkõmp Saksamaal vallalõ päsnü. Äkki selle omgi näide kantsler säändses imelikus lännü, et nuu molõkuli omma tälle pää sisse päsnü. Ku iks raha om parõmb ku rahu, sõs om rassõ otsussit tetä.
Eestih om tuu vast üles löütü, inämb niipall’o molõkulist ei kõnõlda. Meil kõnõldas vähä suurõmbast as’ast, mille seeh omma hoobis aadomi. Näütüses pronksist tettüst mehest. Tuu om nigu kodokäüjä, kiä ei anna meile rahhu.
