Nigu inneaignõ lats
Ma kuuli raadiost, et vahtsõnõ valitsus saa ammõtih olla õnnõ katõssa kuud. A kuulda om, et tuu aoga tahetas kõgõ maailma tegemädä as’a kõrda säädä. Plaan om hää, a ma pelgä, et taaga või minnä nigu inneaigsõ latsõga, kiä saa õnnõ katõssa kuud imäüsäh olla. Mõni katsandal kuul sündünü lats om väega kimmäs, a mõnõl om egäsugumadsi häti.
Pääasi, et ministri umavaihõl kõnõldus saava. A ku lätt nigu vanaaigsõ valmi tegeläisiga, koh luik, haug ja vähk naksiva egaüts esi poolõ kiskma, sõs või sünnütüs rassõ tulla. Ja kõnõlda tulõ iks näost näkko ja silmäst silmä. Pall’a Mol’oraamatuhe kirotamisõga saa ei riiki juhti. No ku ütstõist kullõldas, sõs või saia üteh ka pääle urbõkuud edesi valitsa.
