Üte käega antas, tõõsõga võetas
Ma kuuli raadiost, et vahtsõst aastast pantas pästjile, pritsimiihile, politseilõ ja oppajilõ palka mano. Tuud om jo aastit kõnõldu, et nuu ammõdimehe piässi saama vähämbält Eesti keskmäst palka. A kõgõ jõud tuu keskmäne iist är minnä.
Seokõrd vähämbält lubatas kimmäst palga nõsõmist. Palk lätt kogoni nii suurõs, et oppajist ja pästjist saava korgõpalgalidsõ. Korgõpalgaliidsil piät korõmba protsõndiga tulumass kah olõma. Selle tulõ näil edespite tulumassu inämb massa ku seenimaani. Tuu säädüs käänetäs külh ümbre, et alamba palga saaja piä-i säält inämb tulumassu masma. A nii kavvõndahe säädüsetegijä es jõvva, et korgõmbast tulumassust päsessi pästjä ja oppaja kah. Üte käega antas, tõõsõga võetas.
