Pildiga sportlasõpilet

 
Võro sportlasõ omma iks läbi ao häid tulõmuisi näüdänü. Umaaignõ spordikooli juht Neeme Harri tahtsõ väega, et Võro latsõ iks kõgõ võistluisil käünü.

Ütskõrd tull’ kõrraldus, et sportlasõpiledi pääle tulõ panda umanigu pilt. Harri käskse nuuril kipõstõ pildistäjä mano minnä, muido ei lasta võistlusõlõ.

Mu lellepoig Rein oll’ sis viiendän vai kuvvõndan klassin ja tegi suusahüppit. Võistlusõni oll’ puultõist päivä aigu, mis tähend’, et pildiga oll’ kipõ.

Võrol tüüt’ tuulaol viil vanõmba põlvõ kipõ-piltnik Kepniku Ida. Nä olli varramba üten tõõsõpoolõ Aleksandriga olnu tunnõdu piltnigu. Aig oll’ lännü, a Ida tekk’ pilte iks ummi vanno massinidõga. Ja tä lubasi nüüd kah Reinu jaos pildi järgmädses pääväs valmis saia.

Ku Rein pildile perrä läts’, istõ Ida lavva takan ja käskse täl karbist pilti otsi. Poiss kai karbi läbi, es lövvä. Ida käskse viil hoolõga otsi. Peräkõrd tundsõ Rein üte hudsudsõ pildi päält uma kruudilidsõ hammõ är. Ja hiussõseitli oll’ kah tsipa tutva.

Poiss vei pildi Neeme Harri kätte. Harri võtsõ pildi peo pääle, kai ligembält ja kavvõmbalt ja sis ütel’: «Ma ei saa arvo, olõs nigu 60aastanõ vanamiis tan pildi pääl.» A midägi es olõ tetä, pilt liimiti piledi pääle ja lüüdi pitsat kah pääle.

Perän võistlusõl tull’ vällä, et es küsü kiäki sportlaisi käest tuud pildiga piletit nätä.