Aasta mehe võistlus

 
Joba aastit om üten Võromaa külän peetü võistlust «Aasta miis». Kokkovõtõ tetäs aastavahetusõ aigu ja võitjalõ om avvohind kah: välläsõit ütte Eesti suvitusliina, Pärnulõ vai Villändile vai viil kohegi.

Et tegemist om maarahvaga, om võistlus kah sääne, nigu umal aol oll’ «Viläveski» nunnuvõistlus. Kaias, ku suur om kellelgi saak olnu, kes om kasvatanu ilosa kardoka, kapstapää, põrkna. Võistlusõst võtva ossa ka kala- ja jahimehe, nimä omma uma saagi üles pildistänü.

Ülekaemisõ man tulõ vahepääl pettüst kah vällä. Üts väikeistviisi luulõtaja oll’ seokõrd toonu mitu vihutäüt luulõtuisi, a kotusõpääline koolioppaja, kes oll’ tennü uurmisõ vanõmbist luulõtajist, löüdse säält seest vanno eesti luulõtuisi. Tuu miis võeti pettüse iist maaha. Tõnõ miis jälki oll’ lisas naasõlõ pandnu ka armukõsõ siini korjama ja sisse tegemä, et suurõmbat saaki näüdädä. Kiäki tiidse tuud ja kõnõl’ vällä, et om abijõudu tarvitõt.

Peräkõrd oll’ jäänü ütsainus miis, kes es olõ viil sõnna saanu. Tä oll’ külän vahtsõnõ. Tuu miis ütel’, et tan om hulga kõvvu tegijit, a täl om kah üts väiku kõrdaminek. Jõuluvana üskä nõstõti häll väiku latsõga, tuu nakas’ kõrraga jõuluvana habõnit kakma. Rahvas naardsõ ja pesse kässi kokko ja nii oll’gi otsustõt, kes aasta mehes saa. Vahtsõnõ miis mõistsõ hindä vällä kõnõlda, uma õnnistumisõ häste vällä mängi ja nii saigi nuur esä tuun külän avvohinna «Aasta miis 2022».