Egä asi umal aol
Ma kuuli raadiost, et liinainemise olõ-i uma eloga rahul. Kõgõ inämb nurisõsõ rattamehe. Näil ollõv rassõ lumõ seeh rattaga sõita. Ku ma nuur olli, sõs sõidõti talvõl suusõga ja suvõl rattaga. Ka seo talv sai Tal’na vanaliinah suusõga uulitsat pite alla laskõ. A täämbädsel pääväl om elo nii hääs lännü, et piät kimmähe saama suvõl suusata ja talvõl lumõga rattaga sõita.
No taivataat sai nurisõjidõ pääle pahatsõs ja võtsõ lumõ hoobis är. Asõmõlõ tulli iä ja muda, sõida sõs rattaga vai suusõga. Mi saa ei ilma ümbre pöördä, tulõ iks rahul olla tuuga, miä om, ja maa pääle tagasi tulla. Egäl aastaaol olku uma tegemise.
