Timahavanõ folgipido «Mooste elohelü» on joba seol nädälivaihtusõl: 1. ja 2. põimukuul. Pikälavvapidoga tähüstedäs riidi Mooste folgikua 15. sünnüpäivä ja puulpäävä õdagu peetäs rahvamuusigasäädelüisi võigõluskontsõrti, kon võtva mõõtu ütstõist bändi.

Festival nakkas pääle riidi kell 16.30, ku ansambli Lõõtsavägilased tege muusikidõ tüütarrõ. Kell 18 hõigatas timahavanõ pido ammõtligult vallalõ ja pääle tuud peetäs folgikuan pikälavvapito, kon astusõ üles ansambli Uurikad ja Lõõtsavägilased, Neitsovi Paul ja Hinrikusõ Henrik. Kesküüse tege Austraalia-Eesti viiemeistri ja multimeediäkunstnik Muska Olev mõisaaidan helürändämise.

Puulpäävätsen kavan saa pia egä poolõ tunni takast kullõlda kontsõrtõ. Üles astva väega mitmõsugumadsõ artisti ja bändi, om rokki ja punki, tandsu ja laulu, kostus kandlõ- ja saksofonimängu. Päivä alostas mõisatsõõrikäük mõisaherrä Needo Üloga. Võro ja seto perimüsliidsi laulõ ja mänge saa laulda-mängi üten folkloorirühmäga Käokiräs ja ansambliga Liinatsuraq.

Õdagudsõl võistluskontsõrdil om kats külälist Lätist: ansambli Kaligo ja Māra Dagne. Eesti bändest võtva mõõtu ansambli Runaoja, Susanna Viktoria, KST, Humin, Nova Lyre, Küi, Näkken, Sandra Lõoke ja Õed-Vennad Ristikheinad Vähendatud Koosseisus. Võistluskontsõrdil kand egäüts ette kats laulu. Timahavanõ kimmäs rahvalaul, midä kõik esitäse, om «Lõpõ, lõpõ, linakõnõ!».

UL

Mooste folgikua perremiis Hinrikusõ Henrik kuts pitto. Pilt videost