8. vahtsõaastakuul peeti Linda rahvamajan Võro maakunna kultuurirahva tenoõdagut, kon jaeti preemjit ja tunnustuisi ligembäle poolõlõsaalõ maakunna kultuuri-, raamadukogo- ja muusõumitüütäjäle, käisitüümeistriile ja kultuurirühmi juhendajilõ. Preemjit jagi Eesti Kultuurkapitali Võromaa ekspertgrupp, lisas rahvakultuuri keskus, Võro instituut ja Võromaa keskraamadukogo.

Tenoõdagu kõgõ suurõmba tunnustusõ, tiitli «Kultuuripärl 2025» sai dirigent, oppaja, riikevaihõlidsõ kultuurivaihtusõ luuja ja kogokunna kokkoköütjä José Antonio Page Ramírez, kiä tegotsõs päämidselt Võro muusigakoolin. Võro maakunna elotüüpreemiä anti Setomaa kultuurielo hoitjalõ Sarvõ Õiele. Elotüütoetusõ sai Kreutzwaldi muusõumi vidäjä Hollo Aimi pikäaolidsõ ja häie tulõmuisiga tüütämise iist muusõumin.

Tõisi siän saiva tunnustuspreemiä kats võrokeelidse keelepesä vidäjät latsiaian: Saarnitsi Helen ja Päevalille Maia. Kõiki avvohinnasaajit ja pilte tenoõdagust saa kaia Võromaa arõnduskeskusõ kodolehe vorumaa.ee päält.

Tenogõdagu juhi olli Viiardi Mari ja Kirsipuu Alice. Muusikat teivä Hundi Indrek ja Metsla Märt ja Ilma Kristini bänd. Klavõrit mängse Raudkepi Einar. Õdagu kõrraldi Võromaa arõnduskeskus ja kulka Võromaa ekspertgrupp.

UL

Timahavadsõ Eesti Kultuurkapitali Võromaa ekspertgrupi aastapreemjide saaja ütidse pildi pääl. Männe Tiina pilt