Mul om üts halv harinõminõ: kae ülearvo pall’o telekat. Egä päiv käü «Südameasi», sis «Õnne 13» vana osa ja sis Soomõ haigõmajasari «Pulss» viil sinnä otsa. Magama suiguta hinnäst joba tiid mitmõs kõrd otsast otsani nättü nal’aseriaaliga «Kaks ja pool meest». Olõ mõnikõrd mõtõlnu, et tsipa pall’o saa. A midägi tetä kah ei mõista, säändse vana ja joba nättü saatõ avitasõ päävämõttist vallalõ saia.
Egäpäävätsile saatilõ lisas omma iks aastit olnu vahtsõ nal’asaatõ kah, midä telekanali aastavaihtusõ aigu pakva. A seokõrd oll’ tõistmuudu. Ei tiiä, kas riigivõim om telekanalidõga kokko lepnü, et tulõ naada inemiisil halvu harinõmiisi mant är har’otama vai mis, egäl juhtumisõl es olõ vana-aastaõdagu mu jaos üttegi saadõt, midä kaia tahtnu. Paari nal’asaadõt kai, üts võtsõ tsipa muigama kah, a suur jago tõi pääle nõvvulda olõki.
Paistus, et aig, ku telesaatõ olli väega tähtsä osa vana aastaga ärsaatmisõ rituaalin, nakkas otsa saama. Miä tulõ asõmõlõ, täämbä viil ei tiiä. Looda, et inemise ei võta üte halva harinõmisõ asõmõlõ umas mõnt tõist, a pruuvva olla, midä aig edesi, iks tsipa parõmba ja targõmba.
Rahmani Jan,
Uma Lehe päätoimõndaja
