Minevä aasta perämäidsil kuiõl tull’ Võromaa partnõrluskogol põnnõv katsõprojekt päälkiräga «Mi, mehe!». Kokko naas’ käümä miihisumm vannusõn 55+, grupi iistvidäjä olli Prii Kristjan ja Peetsalu Erkki. Kokko tull’ 12 miist ja kuun käüti 10 kõrda.

55+ um sääne igä, et latsõ umma inämb-vähämb kotost lännü, olõt jäänü kunagidsõ vällävalituga katõkõistõ. Säändsen iän mehel um küländ rassõ löüdä vahtsit välläkutsit ja tegemiisi. Ku mi kaemi egäsugutsit tsõõrõ, mis kuun käävä, näütüses laulu-, rahvatandsu- vai raamadutsõõri, sis inämbüsen umma sääl naasõ. Mehe ei taha vällä minnä, viil inämb hindäst kõnõlda.

Nii olli mi summan kah alostusõn mehe küländ väiku jutuga. A päält kolmandat-neländät kokkosaamist olli mehe tsipa inämb tutvas saanu ja naksi vallalõ minemä, kõnõlõma umast elost nii, nigu periselt um, ja tuust, mis näide elon periselt juhtus. Kõgõst, miä näid egä hummogu sängüst vällä aja ja toimõndama pand.

Tollõn seltskunnan tekkü mul paar põnõvat vau-efekti. Üts miis kõnõl’, kuis tä naas’ koton aasta lõpun kõnõlõma, et tä ei olõ terve aasta minkagi nakkama saanu. Tuu pääle lugi naanõ tälle ette, midä kõkkõ miis aasta joosul perre ja kodo hääs är um tennü. Sääne tubli naanõ! Vai tõnõ momment, kon muido vaiknõ miis naas’ umist tegemiisist kõnõlõma. Säält tull’ puhast kulda, saimi teedä, midä tuu miis periselt elon kõrda um saatnu.

Um väega tähtsä, et mehe olnu valmis hindäst kõnõlõma ja saama vabas uma henge pümmen katõdraalin olõvast as’ust, ka säändsest, midä ei julgu sõbralõgi vai koton kõnõlda. A säändsen grupin tulõ ütte-tõist vällä. Mi ei tohe asjo hindä seen hoita. Maailm um pall’o ilosamb ja parõmb paik, ku julgõmi ummi mõttit tõisiga jaka.

Taa oll’ edimäne projekt, a mi lepemi miihiga kokko, et saami edespite kah kõrra kvartalin kokko ja kõnõlõmi, midä vahepääl opnu olõmi ja kuis tuu meid elon edesi avitanu um. Mu ärtundminõ um, et säändsit kokkokäümiisi võinu rohkõmb olla. Vast sis mi mehe kah saava parõmbas uma perre, uma kodo ja ütiskunna jaos. Kimmäle um mi summan noid kah, kiä umma valmis vahtsõt miihikampa iist vidämä, ku tuu piäs kokko käümä nakkama.

Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.