Üte võhru asõmõlõ tõnõ
Ma kuuli raadiost, et aasta eläjäs om nimmat võhr. Ku mineväaasta tõi aasta elläi nahkhiir jo küländ hätä ja pahandust kaala, sõs nüüd võinu tuust oppi. Niisamma oll’ jo Hiina kallendri perrä minevä aasta rotiaasta. Vet Hiinast om tuu rändrott kunagi siiä rännänü.
Jo vanarahvas tiidse, et ku võhru nakkasõ elämiste tükmä, tähendäs tuu halva. Ku unõh võhru näet, sõs tulõ tülü ja tapõlus vai muu pahandus.
Seoga massa-i vahtsõst aastast pall’o hääd uuta. Toolõ kaemalda, et aasta tsirgus om kuldnokk, kiä mõnõ kuu peräst piässi meile keväjät kuulutama.
Mudoki arvatas, et võhr om eski targõmp ku pini. A ku tuud tarkust kur’aga pruuki, sõs hääd nahka saa-i. Nii et seo aasta om uuta suurõmbat sorti jüramiisi. Pelädä om, et inne valimiisi nakkasõ ka poliitigu ütstõist jürämä.
