Tal’nan Kadrioru raamadukogon käü joba paar aastakka kuun võro keele kohvitarõ. Tuu tähendäs, et katõl kõrral kuun neläpäivilde saava võro keele huvilidsõ kokko ja kõnõlõsõ umast keelest ja ilmaas’ost. Parhillatsõl koroona-aol om kohvik kolinu internetti ja tuu om toonu mano huviliidsi ka kavvõmbast.

«Tal’na keskraamadukogon om pikkä aigu mitu keelekohvikut ja keeletsõõri olnu. Mi mõtlimi, midä võis tetä Kadrioro haroraamadukogon. Tuu tull’ nigu loomulikku rata piten, et teemi võro keele kohvitarõ,» seletäs Võrost peri raamadukogohoitja Orioni Jana kohvitarõ saamisõluku.

Alostusõn tegüsi kohvitarõ kõrraldajil väega hää kuuntüü Tal’na Võro seltsiga. «Inämbüs rahvast om säält seltsist, olõ seo kohvitarõga saanu hindäle hulga vahtsit tutvit. Nüüd, ku pidimi uma tegemise veebi kolima, om tulnu kavvõmbalt kah inemiisi. Mi jaos oll’ veebi minek tsipakõsõ nigu võit: peräle jõudva ka nuu, kiä muido ei jõvvas,» kõnõlõs Orioni Jana.

Inämbüisi tundvagi kohvitarõ tegemiisi vasta huvvi Võromaalt peri inemise, mõnõl omma juurõ Võromaal, mõni om esi Võromaal sündünü.

A midä sääl kohvitarõn sis tetäs? «Kõnõlõmi pääväas’ust, tuust, mis uudist. Mõnikõrd loemi Umma Lehte. Proovi kõgõ iks kirändüsligu minodi kah sisse tsusada. Ku mõni võro kiränik vai raamat om avvuhinna saanu, sis tuust kõnõlõmi. Kaplinskist kõnõlimi, ku täl oll’ juubõl. Loimi ette timä võrokeelitsit haikusid. Ütskõrd käve Häniläne umma loomingut ette lugõman. Viimäne kõrd kõnõlimi Eesti keeleteost, arotimi, kes midä hääletämä nakkas. Jutust meil puudu ei tulõ.»

Janalõ hindäle miildüse võro kirändüsest kõgõ inämb Laanõ Triinu raamadu. «Tahas tedä esi kah nätä, käppä pitsitä,» luut Orioni Jana.

Võro keele kohvitarõ käü kuun Uma Lehe ilmumisõ pääväl kellä poolõ kuvvõst poolõ säitsmeni. Huvilidsõ saava e-postiga Zoomi lingi kohvitarrõ sissepäsemises. Tuu jaos tulõ hindäst teedä anda: jana.orion@tln.lib.ee vai 601 3420.

Rahmani Jan

Kohvitarõ kõrraldaja Orioni Jana.