Kuimuudu om võro kirändüs vällä kujonu ja kohe täämbädses pääväs jõudnu? Noilõ küsümüisile ots vastust kirändüstiidläne Velskri Mart uman ülekaehusõn «Võru kirjanduse kujunemislugu», midä saa seost nädälist e-välläandõst lukõ.
50 raamadulehe pääl om kirän, määndse olli edimädse võrokeelidse trükidü teksti, kuis ja kiä naas’ tiidligult võro keelen kirotama ja mis aol om võro kirändüst kõgõ inämb tettü. Tulõ vällä, et ku varatsõmbal aol oll’ võro kirändüslugu osa lõunõeesti kristligust traditsioonist, sis 20. aastasaa võro kirändüse päänõstmisõ omma käünü kuun momentega, ku kultuurilidsõ otsmisõ Eestin terävämbäs omma lännü.
Päält teksti löüd välläandõst hulga pilte tähtsämbist võro kirändüse tegijist ja raamatist.
Ülekaehusõ and elektroonilidsõl kujol vällä Võro instituut Allasõ Tiia iistvidämisel. Huvilidsõ löüdvä vahtsõ välläandõ Võro instituudi kodolehe päält: wi.ee/wp-content/uploads/sites/14/2021/09/kirjanduslugu.pdf
Rahmani Jan
Võro kirändüse kujonõmisõluu kokkokirotaja, kirändüstiidläne Velskri Mart. Rahmani Jani pilt
