Mi elokõnõ om äkiliidsi muutumiisi täüs. Ütspäiv om 30 kraati lämmind, sis tulõ äkki üükülm ja ei olõ teedä, kas kurgi sääl kattõloori all tuu äkilidse muutumisõ üle elässe vai ei.
Latsil om kuul pääle naanu. Tuugi tähendäs äkiliidsi muutuisi elokõrraldusõn. Mis kell üles piät tulõma? Mille koolibussi säändsel aol ja säändse tsõõriga käävä, et kuuli jõudmisõs tulõ varra üles tulla ja tunn aigu bussi pääl loksu? Määndse huvitsõõri tulõ valli ja kuis koolist kodo saia?
Pall’o hummõn eelektri mass? Miä saa sis, ku ilm ei lääki inämb seo süküs lämmämbäs ja piät tarrõ kütmä nakkama? Mis tuu kõik mass? Kost tuu raha võetas?
Küsümüse, küsümüse, küsümüse. Ja niipia, ku mõni näist vastussõ saa, tulõ äkki kostki määnegi vahtsõnõ hädä, midä varrampa pelädägi es mõista.
Jah, mi elämigi parhilla säändsen äkiliidsi muutumiisi aon. Midägi ei olõ tetä, kuigimuudu tulõ iks toimõ saia. Tähtsä om hoita selget miilt ja kimmäst tsihti, sis ei suta äkiliidsi muutumiisi tuulõ meid ülearvo hullustõ kõiguta.
Rahmani Jan,
Uma Lehe päätoimõndaja
