Minevä nädälivaihtusõ tei läbi põh’aligu organismi puhastusõ. Olli seo kotsilõ kittüst kuulnu ja ku üts sõbõr soovit’ tetä ensüümega puhastuskuuri, võti tuu ette. Kõgõ parõmb paik tuud tetä om maal mõtsa seen, kon saa ummi vallapäsevide tundidõga ütsindä olla, näid läbi jürrä ja sannan mõnnu tunda.
Soolikit kutsutas mi tõõsõs ajos, massa kihä süämes. Ku mi ajo om kihvti täüs ja ei olõ puhas, sis ei saa tä meile väega selget märgüst saata. Ja ku mass om kihvte täüs, ei saa timä kah inämb mi tundit selgele edesi anda. Massa puhastaminõ avitas muu hulgan priis saia ärkäkitüil tundil ja pääle massapuhastust võimi uma silmäga nätä sapiliiva vai sapikivve kibõnit, miä kihä seest vällä nakkasõ tulõma.
Ku kihhä olõ-i pikkä aigu puhastõt, nakkasõ hariligult säändse hädä pääle: kaal lätt üles, kõtt punni, pääle tulõ väsümüs, depressioon, siitmine lätt aigladsõs jms. Tuu pääle, et mi uma kihä sisse kihvte olõmi kogonu, või peris kihvti võtta. Mi elämi jo ärtsurgitun elokeskkunnan, söömi inämbüisi kemikaalõga süüki. Esieränis kimmä võiva olla tuun sõltuvusõga inemise, kiä kõrraperätsele kohvi, alkoholi ja nikotiini tarvitasõ. Olõ jo pikkä aigu inemiisi kaenu ja esieränis halv om kaia joba noorõmbit ku 30aastaidsi miihi, kinkal kõrraliku punnkõtu iin, vanõmbist kõnõlõmalda. Ja seo ei tulõ õnnõ õllõjuumisõst.
Traditsioonilidsõ Hiina meditsiini perrä saa mi organism hinnäst esi terves ravvi. Midä väikumb om kihä kuurma ülearvo as’ost, toda parõmbalõ tä hinnäst tund. Kihä puhastamisõga annami hindäle võimalusõ valla saia toksiinest ja jääkainist. Päält tuud lätt ainõvaihtus parõmbas, söögiainõ imendüse parõmbalõ ja kihä tund rohkõmb.
Ma tei puhastuskuuri läbi 100% kasvoliidsi ensüümega, miä omma süümisspetsiäliste puult vällä tüütedü. Ku inemine, kiä ilmangi paastu ette võtnu ei olõ, pelgäs, et vast tulõ hirmsa nälg pääle, sis tuu pelgämine om tävveste as’anda. Päält hirmu olõ-i kaota midägi.
Lumiste Kati
Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.
