Salahanõ väetüsemuld
Ma kuuli raadiost, et jälki tulõ valli. Seokõrd piät valima, kas täütä säädüisi vai naada kur’ategijäs. Targa liinainemise omma vällä mõtõlnu, kuimuudu söögitsolki ja muud asku eräle hoita. Tuu tähendäs, et nüüd piät liinainemisel ka köögih tsolgipang olõma, nigu maal kõik aig om olnu. Liinainemiisiga om klaar, näile tulõ maja mano tsolgitünn ja massina veevä kõik minemä.
A maal om olnu tõistmuudu. Vanastõ lätsi söögiperä tsiapangi ja tsiga sai kõtu täüs. A tsika võit õnnõ salguisi pitä. Innembä seivä pini ja kassi inemiisi söögiperri. A nüüd söövä pini õnnõ poodipräänikit. Sõs piätki esi kõik är süümä, mis süvvä sünnüs. Kardohkakoorõ olõ visanu iks asuunkuhe. A ku inspektri tulõ perrä kaema, kas ma iks säädüse perrä umah unikuh väetüsemulda tii, sõs tulõgi vällä, et ma piä-i säädusest kinni. Piät olõma kast. A ku osta plastist kasti, kas ma sõs hoia luudust? Ma piä innembä salahast unikut, ku viil luudusõhe plasti mano vii.
