Värskilt om valmis saanu kogomik «Kultuurist väläh om hää olla», kohe omma kokko kor’atu suurõ kirämehe ja mõtlõja Kaplinski Jaani (1941–2021) Võromaaga köüdedü luu ja luulõtusõ. Raamadu säädse kokko kirändüstiidläne Kepi Õnne, vällä and’ Võro instituut.
«Kõgõpäält või vällä tuvva, et raamat võtt kokko Kaplinski võro- ja lõunaeestikeelitsit põhiteossit: «Mõtsa ja tagasi», «Latsepõlve suve» ja «Taivahe heidet tsirk»», seletäs raamadu välläandmisõ vidäjä Allasõ Tiia.
«Kogumikust löüd luulõtuisi, midä Kaplinski om esi kirotanu ja ümbre pandnu, proosakakkit, vällävõttit esseedest ja latsijuttõst, miä omma kas võro- vai lõunaeestikeelidse vai Võromaa- ni Lõuna-Eesti-teemalidsõ. Raamatun omma ka kats Kaplinski Jaani antut intervjuud, üts tenokõnõ, üts tüükava muudu konspekt ja üts seeni käsikirän olnu tekst Lõuna-Eesti kotsilõ. Viil om kogomikun jupikõisi Soomõ rahvuseeposõst «Kalevala», mille Kaplinski pand’ võro kiilde ümbre originaali perrä «Suidsusannasümfoonia» jaos,» kõnõlõs tä.
Mõtõ sääne kogomik tetä tull’ kirändüstiidläsel Kepi Õnnel, kiä om varrampa kokko säädnü mitmõ võro kirändüse klassiku nigu Adsoni, Kolga ja Kangro kuundkogo.
«Kaplinski-raamat om kokko säet häste huvitavalt. Taa tulõtas miilde mosaiiki ehk kildapilti: tekstikakkõ vai terve teosõ vaeldusõ, a poimusõ sõski üte nn süä-teema ümbre. Teküse mõttõlidsõ jagonõmisõ, minkalõ avitas üten pilte valik. Üts märksõna om ka kõrdaminõ: teema ja ka kotussõ Kaplinskil kõrdasõ hinnäst, a iks tävveste vahtsõ nuka alt, nigu suurõlõ mõtlõjalõ ni kirämehele umanõ,» löüd Allasõ Tiia.
Kogomigu «Kultuurist väläh om hää olla. Võromaiseid lugusid ja luuletusi» kaejadsi omma 9. lehekuul kell 16 Põlva keskraamadukogo lugõmissaalin. Põlvan selle, et Kaplinski võromainõ ilm nakas’ pääle nimelt Põlva lähkült Eostõst, kon kiränik latsõn imäpuulsidõ sugulaisi man oll’ ja kõiksugumast (maa)ello opsõ, taa hulgan muidogi võro kiilt kah.
Kaejatsil astva üles ka kiränik Mikita Valdur, kiä kirot’ kogomikulõ üte peräsõna, ja kiränik, Kaplinski Jaani kaasa Toometi Tiia, kiä avit’ kokkosäädjät ja välläandjat seo kogomigu ilmasaamisõ man ekämuudu.
Rahmani Jan
Vahtsõt Kaplinski-kogomikku hoit käen projektijuht, ede- ja peräsõna kirotaja Allasõ Tiia. Rahmani Jani pilt
