Ummõhtõ sai är peetüs edimäne võrokõisi kongress. Seo pidänü olõma joba katskümmend-kolmkümmend aastat tagasi. Parhilla om keerolinõ aigu tagasi käändä.
Kongressil tetti otsus võrokiilse haridusõ ja võro keele avaligu pruukmisõ kotsilõ. Kas nüüt hummõn lätt kõik tõistmuudu? Vaivalt külh. Eski ku taivaesä esi annassi üleväst kõrraldusõ võro kiil mailma tähtsämbäs keeles kuuluta, piämi iks egäüts esi tuu jaos tüüd tegemä. Olõ-i siiämaani ka kiäki kiildnü meil umma kiilt opada ja pruuki.
Perüs hallõ oll’ kullõlda, et pall’o kongressi saadigu ei kõnõlõ võro kiilt. Kas ei mõista vai ei taha? Viil hallõmb, et püüne pääl juhtsõ arotamist inemine, kiä mõist külh võro kiilt, a iks ei kõnõlõ. Selle, et ei olõ harinu. A mille tuu nii om lännü? Kas nüüt tuu papõr tege midägi parõmbas?
Ku tõõperäne om plaan kõiki Vana-Võromaa kuulõ võro keele oppusõlõ vunki mano anda? Ma joba näe, kuimuudu vallajuhi ja koolidirektri haardva pääst kinni. Olõ-i rahha, olõ-i oppajit ja opikava om täüs. Ku om tahtmist, sõs rahha löüdäs. Opikavvo saa ümbre kah tetä. A massa-i arvada, et võro kiilt saa oppi õnnõ võro keele tunnih.
Eesti haridusõ kõgõ suurõmb hädä saa meid avita. Inämbüs oppajist omma vana, kas joba lännü pinsi pääle vai pia sinnä jõudmah. Vet meilgi om tuu nii. Suur osa vanõmbaiäliidsist oppajist omma siist kandist peri ja mõistva ni kõnõlõsõ võro kiilt. Noid oppajit tulõgi appi võtta, et egä päiv egä latsõ jaos vähämbält üts tunn olõssi võro keeleh. Tähtsä om keelekeskkund, kullõminõ ja kõnõlõminõ. Millest kõnõldas, om vähämb tähtsä.
Ku võro kiilt mõist matõmaatigaoppaja, om tuu tunn võro keeleh. Ku mõist tsehkendämise oppaja, tege timä uma tunni võro keeleh. Ja nuu oppaja piät saama ka korgõmbat palka. Esieränis häste om noil kuulõl, koh eräle võro keele ja kultuuri tunni kah saava olla.
Ku asi nii käümä lätt, saa naada kipõstõ mõtlõma tuu pääle, et nuuri oppajit vällä koolita. A kõgõ tähtsämbäs jääs iks tuu, et ku mi mõistami umma kiilt kõnõlda, sõs tulõ tuud tetä kah. Egäl puul ja kõik aig. Mi saami õnnõ esi hinnäst avita.
Säinasti Ene
