Mahlakuuga sai läbi aig, ku Mõnistõ raamatukogun võisõ nelläl pääväl nädälin raamatuid lainada, lehti ja aokirju lukõ. 35 aastaiga tuu iist hää saisunu Veberi Liilia sai talvõlõpul kuundamisekirja ja maikuust pääle päses Mõnistõ rahvas kirjavara manu kõrra nädälin, ku Mõnistõlõ tulõ Varstu raamatukogust Kenderi Merike.

Sääntse henne jaos olulitse tähtpäävä puhul kutsõ Liilia raamatukokku huvilitse, kiä lähkümbäl eläse ja sakõst taa mant läbi omma astunu. Eriti suurõ aitüma ütel’ taa Sarapuu Küllikile, kiä om virk piltnik ja ummi armõdu ilusõid loodusõpilte ka tõisile nätä om toonu.

Raamatukogu om Mõnistõ teenusõkeskusõn tuust saani, kui maja 2012. aastal valmis sai, aga enne tuud om Liilia kolm kõrda kolida saanu. Ku taa võtt’ tüüjärje üle Kuhja Õie käest, kiä oll’ pedänü tuud ammatit 32 aastaiga, oll’ raamadupesä külänõukogu ja postkontoriga üten majan, aga edesi tull’ raamatuidega mitu rehki ütest korterist tõistõ reisi. Üldäs külh, et kats kõrd kolida vai üts kõrd palada tege üte vällä, a vaimuvaraga nii laabsast ümbre kävvü ei saa, nii et tegemist om õks ollu.

Kohvilaua ümbre sooviti Liilialõ tegusat pensionipõlvõ, a peris pensionäris ei saa kerge jalaga prouad külh petä, selle et taal om juhata kats tandsurühmä: üts Mõnistõ rahvamajan, tõnõ Varstun.

Nõlvaku Kaie

Raamatukogu-Liilia (hääd kätt) ütel’ hää silmäga piltnikulõ Küllikile suurõ aitüma ja kinke vahtsõidõ pilte jaos albumiid. Nõlvaku Kaie pilt