20. põimukuul nakkas Võro liinast pääle tsihiotsmisõ- ja mängopäivi sari, miä juhatas tiid tulõva aasta 1. piimäkuul Põlvan Indsikurmun peetäväle Umalõ Pidolõ.

«Inne perämäst Umma Pito teimi matkapäivi ja nuu tõiva egä kõrd uskmada hulga rahvast kokko. Seokõrd mõtlimi liikmispääväle tsipa inämb tegemiisi: et pido teema om «Mäng», alostami ummi päivi Hainsoo Meelika iistvõtmisõl laulumängu selgesopmisõga. Lisas saava egä päävä osalidsõ üte mõtlõmisülesandõ. Ja edesi lätt päiv tsihiotsmisõga,» kõnõlõs Uma Pido kõrraldaja Tigasõ Merike.

Midä tuu tsihiotsminõ vai sis (liina)orientiirümine hindäst kujotas? «Pakumi inemiisile võimalust kaardiga umal käel Võromaad tundma oppi,» seletäs tsihiotsmisrato vällämärkjä Silla Sixten. «Annami kaardi, kon pääl omma är märgitü Võromaa kultuuriluuga köüdetü kotussõ, miä tulõ üles löüdä, ja sääl paiga pääl om määnegi teedüs tuu kotussõ kotsilõ. Inemine pruuv kokkolepütü ao joosul löüdä üles niipall’o kotussit, ku jõud. Kontrollaig om neli tunni.»

Silla Sixten ütles, et tsihiotsmisõst võiva ossa võtta nii nuu, kiä tahtva tõsitsõmpa võistõlda, ku ka nuu, kiä varrampa ei olõ tsihiotsmisõga tutvust tennü. «Julgustusõs om tuu, et punktõ või otsma minnä kambakõisi. Ja kõgõpäält mi õks oppami kah, kuis kaardiga ümbre kävvü. Hää, ku osaliidsil olnu kompass üten, a ku ei olõ, oppami ka tuud, kuis ilma saa,» seletäs tä. Ka äressümist ei olõ mõtõt pelädä, löüd Silla Sixten ja ütles mano, et timä päält 20 aasta kogõmusõ perrä omma kõik raa pääle lännü iks ilostõ ja rõõmsa meelega tagasi jõudnu.

Päält hää tujo ja rõõmsa meele, midä hindä liigutaminõ and, om tsihiotsmisõ- ja mängopäivi kõrraldajil kõvõmbilõ osavõtjilõ meelütüses viil üts avvohind. Nuu, kiä võtva ossa vähembält säitsmest pääväst, saava Umalõ Pidolõ priipiledi.

Säändsit liikmispäivi peetäs inne tulõvast Umma Pito kümme kõrda. Käüdäs är Võro liinan, kõigin katsan Vana-Võromaa kihlkunnan ja üts päiv tulõ ka Setomaal Verskan. Kihlkundõ päävä omma plaanitu suurõmbin keskuisin.

Tsihiotsmisõpäivi kotsilõ saa inämb teedüst: umapido.ee/tsiht ja facebook.com/umapido5.

Rahmani Jan

Uma Pido kõrraldaja Tigasõ Merike ja tsihiotsmisrato vällämärkjä Silla Sixten Võro liina keskplatsi pääl. Säältsamast nakkas 20. põimukuul pääle tsihiotsmisõ- ja mängopäivi sari. Rahmani Jani pilt