Ülearvo kipõ sõit
Vinne aol tetti mõnikõrd säändsit päivi, ku inspektri püüdse tii pääl lubatust kipõmbit sõitjit. Päämidse kontrollja olli ütiskundligu inspektri. Noil käve umavaihõl sotsialistlik võistlus ja tuuperäst nä nuputi, kuis rohkõmb patutsit kinni püüdä. Patudsõ kutsuti perän komisjonni, kon näile trahv määräti.
Tuu miis, kellest taa jutt om, oll’ kah patutsidõ hulgan. Läts’ komisjoni ette, kon üteldi, et tä om lubatust kipõmbalõ sõitnu. Miis es vaidlõ vasta, ütel’, et vast veidükese läts’ kah kipõmbalõ, selle et tii läts’ sääl mäest alla. Viil ütel’ tä, et nägi külh, kuis silt är vaihtõdi, tuu kotussõ pääl om kõik aig olnu lubatu sõita 40 kilomiitret tunnin, a tuupäiv oll’ pantu 30 märk.
Komisjonin olli iks peris inspektri, mitte ütiskundligu. Üts noist sis küsse tuu jutu pääle, kas miis umma spidomeetrit sis es kae. Miis vasta, et täl ei olõki spidomeetrit. «A minka sa sis sõidit?» küsse inspektri. «Võrriga,» oll’ mehe vastus.
Komisjoni mehe jäivä suuri silmiga kaema, määnestki karistust es määrä ja käsivä mehel kodo är minnä. Karistusõ saiva hoobis ütiskundligu, kiä olli sildi vaihtusõga esitegevüst tennü.
