Oktoobrikuul säitsekümmend viis aastaiga tagasi sündü Mõnistõ rahvamaja manh kodu-uurmise ring, kost varsti muusõum vällä kasvi.

Juubõlit tähistedi oktoobri viimätsel puulpääväl ütelt puult uhkõlt ja tõsõlt puult kodutsõlt, ummi inemiisi vääga lahkõlt vasta võttõn. Ja uma inemise olligi kimmäde kõik, kiä pidulõ olli tullu.

Ilm oll’ kallendri perrä ja rõivõid tükke rahval õks vähä sällän olõma, aga õmõta saisti tubli tunn aigu muru pääl ja kullõldi hoolõga eka sõnna, mea Tulvistõ Hele mälestüspingi valla tegemise iihn ja perän kõnõldi. Külm ja viländ es saa arvada tuuperäst, et es olõ kuulda üttegi tühjä sõnna. Kõigil, keä juubilarilõ kingitüse üle andi ja 34 aastaiga muusõumi juhatanu Heled miilde tulõti, oll’ üldä medägi hääd ja lämmind, õkva taa paiga ja inemiisiga ütist.

Kodutunnõt avit’ kasvata tuugi tiidmine, et muusõum pruuv õks kohalikkõ inemiisi hoita. Juurõ omma siin kandin nii juhatajal Rüütli Airil ku mitmal tõsõl tüütäjäl.

Suurõ huviga kaeti ärä näütüs nuist, kiä kodu-uurmise ringist ja vannu asju kogust muusõumi tekki, ja Kõivupuu Marju kokku pant näütüs ristipuiest.

Aidamaja oll’ pererahvas lämmäs küttünü ja viil lämmämbäs saie tuu tarõ, ku kullõldi Kõivupuu Marju loengut «Mehkamaa rahvapärimuses» ja nuuri pillimehi Allingu Rometit ja Hiiobi Bretti. Ilma suurustamada võit üldä, et tuu õdaguspuul muusõumin oll’ tunda ütenhengämist.

Nõlvaku Kaie

Sünnüpäävälidse muusõumi muru pääl tordilavva ümbre. Mõnistõ muusõumi pilt