Välän omma Eesti arheoloogõ liidu plakati, kon arheoloogi näütäse 2022. aastagal tettüid välätöid. A üten müüdä Eestit rändävä plakadinäütüsega omma muusõumilõ vällä pantu ka näüte Vanalt Võromaalt perämädse säitsme aasta arheoloogiliidsist löüdmiisist. Nuu omma peri Tarto ülikooli arheoloogiakabineti ja Võromaa muusõumi kogodõst.
Vällä om pantu kraam, miä om lövvet Urvastõ Ala-Kõrdsi mant, Soe kõrdsi mant ja Loosist, Vahtsõliinast, Lüllemäelt ja Kiräpäält.
Esierälidses tege Võromaa löüdmiisi välläpanõgi tuu, et näütüsevitriini klaasi pääl om liiv ja kaeja piät arheoloogi muudu pintsliga liiva kõrvalõ pühksämä. Näütüse Võromaa osa säädse kokko muusõumi päävarahoitja Otsa Mirja (näütäs pildi pääl huviliidsilõ, kuis näütüst parõmbalõ kaia saa). Esieräliidsi liivaga vitriine mõttõ om vällä märgotanu kunstnik Alliku Ingrid.
Näütüs om Vana-Võromaa kultuurikuan (Katariina allee 11, Võro liin) üllen kooni 7. joulukuu pääväni.
Rahmani Jan
Otsa Mirja näütäs pildi pääl huviliidsilõ, kuis näütüst parõmbalõ kaia saa. Rahmani Jani pilt
