23. jõulukuu hummogu lätt Võrolt 270 kilomiitret pikäle tsõõrilõ Võro maakunda pite buss üten jõuluvana ja kingikuurmaga. Kõiki oodõtas lehvütämä ja MTÜ Saagu Parem iistvõtja Haljendi Piret lupa, et ku tii veeren om lats, sis peetäs buss kinni ja tetäs timä miil rõõmsas. Kokko jaetas lakja ligi 500 kingi- ja kommipakki.
Haljendi Pireti rehkendüse perrä om seo neläs kõrd bussiga Võromaad pite jõulurõõmu vitä ja MTÜle Saagu Parem kümnes kõrd maakunna latsilõ jõulupakkõ tetä. Nimelidse paki saava latsõ ja noorõ, kiä omma umast soovist kirotanu. Säändsit kirju jõudsõ timahava MTÜ Saagu Parem keskustõ päält 140.
Haljendi Piret ütles, et inämb ei massa kõnõlda paki saajist ku rassõn saisun perride latsist. Ku latsõl om olnu suuv, tä om tuu kirja pandnu ja är saatnu, sis tuu täüdetäs. «Täämbäne saaja om tulõvanõ häätegijä. Et hääd tetä, piät arvo saama, miä seo häätego om. Kümme aastakka olõmi seod asja ajanu ja nännü, et kiä om olnu saaja, tuu om täämbä esi kinke ja kommõ tuuja,» kinnütäs tä.
Suur kingitsõõr nakkas 23. jõulukuu hummogu pääle nii, et edimäne piätüs om Väimälän. Lõpõtus om kell 17 Võrol. Lähembält saa bussitsõõri kotsilõ lukõ Facebookist.
Kiä mõtlõs vai küsüs, kas kingi-annõtusõ iks jõudva õigõlõ kotussõlõ (loe: saajalõ), tuud kuts Haljendi Piret lahkõlõ bussiga üten sõitma, parõmbpikõlõ, nigu keskusõ päkädsi hinnäst kutsva, abis olõma. A kõik, kiä tundva, et üts häätego om seo aasta viil tegemäldä, saava keskust tukõ, olku sis raha, makjuisi vai hää sõnaga.
Kabuna Kaile
MTÜ Saagu Parem iistvõtja Haljendi Piret latsi soovikirju sortman. Kabuna Kaile pilt
