Eesti folkloorinõvvokogo kuts seo keväjä perimüshuviliidsi umavaihõl silmäst silmä kokko saama, et kaia üle, midä tetäs, ja ka vahtsit mõttit vällä märki. Kokkosaamisõlõ oodõtas nii noid, kink tüü vai hobi om perimüsega köüdet, ku ka noid, kiä perimüse tundmaopmist viil alostasõ.
«Ku rahvakallõndri tähtpäävä, perimüsmuusiga ja -tands, käsitüü, traditsioonilinõ söögitegemine, rahvameditsiin vai muu perimüsega köüdet asi pand su süäme kipõmbalõ tüüle, olõt kokkosaamisõlõ väega oodõtu,» om kutsmisõn kirän.
Kokkosaamisõl arotõdas Eesti folkloorinõvvokogo mõtõt luvva perimüskuraatoridõ võrk ja märgitäs, kuis ütenkuun paiklikku perimüst viil inämb nättäväs tetä.
Põlva maakunna perimüshuvilidsõ saava kokko 10. mahlakuul kell 15 Põlvan Tillu kohvikun (Jaama 52). Umast tulõkist pallõldas teedä anda 8. mahlakuu pääväs aadrõsi taisto.uuslail@rahvakultuur.ee pääle.
Võro maakunna perimüsrahvas saa kokko 15. mahlakuul kell 13 Võrol Ideekuan (Vabadusõ 12-2). Ossavõtmisõst pallõldas teedä anda meiliaadrõsi VastseliinaRahvamaja@edu.voruvald.ee pääle.
UL
