Pilt lehen inne valimiisi
Raadion kõnõldi minevä nätäl europarlamendi valimiisist ja tuust, et inne valimiisi ei olõ hää kandidaatõ tegemiisist aokirändüsen ilmaas’anda kirota. Umal aol oll’ maakunnalehen pia säänesama riigli: es või panda lehte noidõ inemiisi pilte, kiä kandidiirsevä.
Seo lugu juhtu nii 30 aasta iist. Jäl olli valimisõ tulõman. Ütel hummogul näi, et lehte oll’ üte kultuurijutu mano lännü seltskunnapilt, kon pääl ka nuur Võro tandsujuht, kiä kandidiirse. Hiitü är ja mõtli, et ei tiiä, määne pahandus taast tulõ.
Ja joba kõlisigi telefon. Toro tõõsõl puul oll’ keskiäline provva, kiä es olõ pildiga rahul ja kärkse: «Teil om lehen sääne pilt!»
Otsõ joba egäsugutsit vabanduisi, a kõlistaja läts’ uma jutuga edesi: «Kas teil häpü ei olõ? Ti avaldat lehen pildi inemisest nii lühkü kleidiga!»
