Joba paar aastakka käü Eesti, Türgü, Itaalia ja Poola nuuriga toimõndajidõ kuuntüüprojekt CoolTour, kon ütenkuun märgitäs vällä, kuis nii noorõ ku ka oppaja, kultuuri- ja nuuritüütäjä saanu ummi tegemiisi man parõmbalõ umma paiklikku perändit pruuki. Minevä kuu keskpaigan oll’ projektiga köüdetüide opireis Türgümaalõ, kon saimi tsipa tutvambas säälside ütisüisiga.

Erasmus+ rahastu tugõmisõl sündünü kuuntüüprojekt sääd kokko tüüriistu, miä avitasõ paiklikku perändit noorilõ selgembäs ja põnõvambas tetä. Näütüses omma ütidse tüüga valmis saaman käümätõmbamiskaardi, juhendi nuurikohvigu pidämises, teemaõdagidõ ja esimuudu mänge seletüse. Türgümaal om alostõt programmi, kon noorõ saava minnä mitmõ muusõumi mano priitahtligus, ja säält omma ka edimädse noorõ joba ammõtligult muusõummõ mano tüüle saanu. Olõmi nuuri intervjuiirnü, tennü küsütlüisi ja kor’anu pilte tegemisega mõttit. Egän riigin omma olnu opikäügi ja koolitusõ, kon saias ütstõisi kultuuri- ja nuuritüü-ütisüisi tüüga tutvas.

Eestin om nuuritüü päältnätä häste kõrraldõt – meil opatas vällä inemiisi, kiä nuuriga toimõndasõ. Mu hindä murõ om tuu, et ku nuur tulõ ülikoolist ja nakkas hindäst mõni aastak noorõmbidõga tüüle, sis ku pall’o tiid tä umakandi perimüskultuurist ja kas tä mõist tuud noorilõ edesi anda. Ku nuuritüütäjäl om huvi umakultuuri vasta, või luuta, et tä and ummi tiidmiisi edesi. A sakõstõ om pilt sääne, nigu olõ kuuldnu mõnõn tõsõn riigin nuuri käest päält opireisi: «Aiteh, sai nii pall’o ka hindä kodukandi kotsilõ teedä.» Reisu pääl om aigu kõnõlda ja tiidmisi edesi anda. Hää om ka võimalus hindä kodopaiga tegemiisi, uskmiisi ja kombit tõisi maiõ ummiga võrrõlda.

Mi puult omma perämädsel aol CoolTouri projektin sisu puult trehvänü iist võtma Saarõ Hipp ja Toropi Heli. Tarto Ülikooli aoluutudõng Saarõ Hipp om Uma Lehe lugõja jaos tutva, nuur ja julgõ iistkõnõlõja, tege ilma Tiktokin – näütäs sääl võro kiilt ja kultuuri, kirotas ja kõrraldas kõik aig midägi. Opikäügi omma timäga saanu tõõsõ kvaliteedi: Hipp mõist egäst sambajupist ja aoluusündmüsest helkävide silmiga kõnõlda.

Tõnõ, kiä tiid kõkkõ käsitüüst, mõist Läänemaa ja Võromaa kombiid, and noid nii hindä latsilõ ku Mõnistõ kooli latsilõ oppajana edesi, om Toropi Heli. Säändside seldsiliidsi käest om pall’o oppi ja egä reis om meil hulga arotamist alatõn lambatapmisõst, pühhi pidämisest kooni pulmakombidõ ja rõividõ kandmisõni vällä. Vaihõpääl oppami ütstõsõlõ mõnõ laulujupi vai tandsusammu – egä projektikokkosaamisõ üts osa om ka tuu, et piät tõisilõ umma kultuuri näütämä.

Pildi seo jutu man kõnõlõsõ mi viimätsest opireisist Türgümaalõ, kon nädäli joosul saimi nuhuta väikut ossa ütisüisist, kiä toimõndasõ perimuskultuuri ja nuuriga. Umavalitsuisi rahaga nuuritüüd tegeviid ütisüisi sääl ei olõ, kõik omma mittetulundusühingu ja otsva esi tugõjit, kirotasõ projektõ.

Lisas kaimi Türgümaa kõgõ suurõmbat kultuurikeskust, kon om oopõrisaalin 2000 istmiskotust ja piledi masva 10 eurot. Tuu ei olõ väiku summa, ku oppaja tiin veidü päält 500 euro kuun. Kaemist ja kullõmist oll’ pall’o: pühäkua (mošee), uulidsakultuur ja -muusiga, ramadaan, mitmõsugumadsõ muusõumi, kauplõmisõkultuur.

Türgün oll’ valimiisiaig ja tuuperäst olli kõik uulidsa täüs poliitikidõ pilte. Olli lipuketi, suurõ lipu, minkast bussi läbi kihoti, lisas suurõmba ja vähämbä bussi, kost lasti väega kõvastõ türgikeelist muusikat ja kost päält sai viil kõrd ka mi jaos joba tutvas saanuid poliitikidõ nägosid nätä.

Ku võrokõnõ saa teedä, et naabrusõn om sann, tulõ-i tuud tälle mitu kõrda üldä. Ütel hummogul heräsimi varra. Kell 7 ollimi paikligu sanna hammami ussõ takan ja kuigi edimält es tiiä, kuimuudu sääl toimõnda – sannanaanõ kõnõl’ õnnõ paiklikku kiilt ja sanna lae pääl oll’ 150 aasta mõskmisõst tulnu esieräliselt haisva kiht –, sõs pääle mõsunaasõ tettüt tasomist ja mõskmist oll’ olõminõ viil mitu päivä hää kerge. Üts poola tütrik es usu, et mustusõrulli tä hindä päält peri olli, arvas’, et mõsunaanõ om kinda määndsegi haisva ollusõga kokko määrnü.

Ku kiäki Türgümaalõ trehväs, sõs mi soovitus om otsi üles sääne sann, kon käävä ka kotusõpäälidse inemise. Sääl saa nätä peris kultuuri ja peris paiklikku rahvast, ka rahha ei küstä pall’o.

Türgümaa inemise jäivä miilde ku väega lahkõ rahvas, kinkal om aigu suidsu kõrvalõ tiid juvva ja ilmaasju arota. Arvada õkva tuuperäst es näe mi üttegi kur’a olõkiga kotusõpäälist inemist.

Laube Kadri

Istanbuli liina Euruupa puul üüse. Paistusõ ilmakuulsa pühäkua, kural Sinine mošee ja häädkätt Hagia Sophia. Laube Kadri pilt

Nelä riigi noorõ ja nuuritüütäjä, mi vastavõtja, Istanbuli kultuuri ja spordi ütisüse IKOS tarõn CoolTouri plakatiga posiirmän. Laube Kadri pilt

Hää sõbõr ja vastavõtja Burak oppas meile, kuimuudu tulõ sisse astu islamiusu pühäkotta mošeede. Laube Kadri pilt

Väiku oliivivalik turu pääl. Laube Kadri pilt

Lämmä õhuga sann hammam. Laube Kadri pilt

Keväjähäitsme kesk urbõkuud. Laube Kadri pilt