Kolmapäävä, 8. lehekuul peeti Sännä kultuurimõisan Adsoni Arturilõ pühendedüt võrokeelidse luulõ lugõmisõ päivä. Luulõtuisi tull’ lugõma 19 koolinuurt ütsäst koolist. Luulõpääväl hõigati vällä ka võrokeelitside kirätöie konkursi «Mino Võromaa 37» parõmba kirotaja.
Päävä vabambat ja lustilist miilt avit’ hoita tuu, et seokõrd es olõ tego võistlusõ, a luulõpidoga, kon kullõldi lugõmist, a kotussit vällä es anta. Uma lemmikesitüs oll’ egälütel võimalik siski mummukõsõga är märki. Päält luulõtuisi lugõmist ja kirotajaavvohinna vastavõtmist oll’ pääväst ossavõtjil võimalus kaia ümbre Sännä kultuurimõisan ja lüvvä üten luulõtusõ lugõmisõ tüütarõn.
Luulõtuisi olli tulnu lugõma koolinoorõ Haani, Harglõ, Mõnistõ, Nõo, Orava, Põlva Jakobi, Vahtsõliina ja Võro Kreutzwaldi koolist. Lugõjidõga üten olli luulõpidolõ tulnu ka näide juhendaja.
Säänest luulõpäivä peeti joba 21. kõrda. Timahavadsõ kõrraldaja Uguri Kadri jaos oll’ edimäne kõrd säänest päivä iist võtta. Tä löüd’, et edesi pidänü luulõpäävä minemä ka rohkõmb luulõpido vormin. «Ku võistluspinge asõmõlõ tulõ opmisõ- ja mõistmisõrõõm, sis vast tulõ esinemiskogõmust otsma inämbki nuuri,» selet’ Uguri Kadri.
Adsoni-päävä kõrrald’ Võro instituut, tugõja olli Eesti Kultuurkapital, Sännä kultuurimõis ja OÜ Isejutt.
Rahmani Jan
Luulõpääväst osavõtja täütsevä Sännä kultuurimõisa saali kinäste är. Rahmani Jani pilt
Kõgõ kavvõmba lugõja olli luulõpääväl Nõo kooli opilasõ. Näide laululinõ kava tekk’ tutvas mi mõtsu puid. Rahmani Jani pilt
Põlva Jakobi kooli latsi juhendaja Lepassoni Marju. Rahmani Jani pilt
Luulõpäävä kõrraldaja Uguri Kadri and kätte osavõtmisõ tenokirjä lugõjalõ Põlva Jakobi koolist. Rahmani Jani pilt
