Timahavanõ, järekõrran 25. eesti rahvamuusiga tüütlüisi festival Mooste Elohelü tulõ 5.–6. hainakuul ja ettevõtmisõ kesken om seokõrd rahvalaul «Vihmakõnõ, vellekene», mille om lindi pääle laulnu Rõugõst peri Männiste Linda (1911–1999).

Võistluskontsõrdil 6. hainakuu õdagu tulõva vahtsõ variantsiga seost rahvalaulust püüne pääle 12 muusigapunti: Permanent Blue, Lämmi Üü, Patrick Staak ja Bänd, Paulina & Miia, Õed-Vennad Ristikheinad Vähendatud Koosseisus, duo Tõiv, Meteora, Õtekse, Lummatus, Ehale, Humin ja Kuma.

Festivali pääsündmüse mano juhatasõ lauluõdak Mehikuurman 4. hainakuul, kon esinese Mooste pilliklubi, Ütsiotsõ ja Kirekibõnaq, ja kontsõrdi Mooste folgikuan riidi, 5. hainakuul. Riidine viimäne lava pääle astja om Curly Strings ja pääle näide ülesastmist saa inne üüund miili rahustamisõs viil matkada.

6. hainakuul om Mooste mõis laulu ja pillihelle täüs hummogust pääle, üles astva muusigu Setost Villändini ja Tal’nast Saarõmaani. Kooni õdagu lätt valla võistluskontsõrt ja saa selges, kiäl om õnnõstunu seokõrd vana laul kõgõ kõrvuköütvämbähe vormi säädi.

Täpsembält saa festivali kotsilõ lukõ kodolehe moostefolk.ee päält.

Kabuna Kaile

Minevä aasta rahvamuusigatüütlüisi festivalil Mooste Elohelü pääpreemiä saanu ansambli trad.kvintessents. Pilt kodolehe moostefolk.ee päält