Puulpäävä, 20. hainakuul peeti Võro küle all Navi külän kogokunnafestivali. Festival oll’ esieräline tuu poolõst, et kava oll’ kokko säet paigavaimu tähtsäs piten ja suur osa oll’ kõrraldamisõ man nooril.

Kogukunnafestivali kava oll’ kirriv: oll’ ütist vaibakudamist, perrepuiõ istutamist, kastiautoga küllä pite sõitmist, meisterdämist, spordimänge, tüütarri ja muud. Uma kotus oll’ aoluujuttõl.

Üts põnnõv rändämine oll’ paigavaimu otsmisõ matk, kon Allasõ Tiia ja Parhomenko Maara iistvõtmisõl käüti müüdä Navi küläga köüdetüide kiränige ja kunstnigõ ratu. Nii rännäti Navitroll’a, Kasagu Ennu, Navi Tia, Jõgeva Sandra ja Jüvä Sulõvi latsõpõlvõratu pite, kõnõldi tsipa paigavaimust laembalõ ja otsiti vastust küsümüsele, midä esierälist käkk Navi külä hindä seen, miä taa kandiga köüdetüid inemiisi luuma sund.

Festivali man jäi silmä, et hulga tegemiisi oll’ noorilõ. Külä tulõvigu pääle saiva märki esiki latsõ, kiä kunstnik Navitroll’a iistvõtmisõl maalsõva pildi tuust, määne võinu olla Navi külä tulõvigun. Latsi silmi läbi omma tulõvigun tähtsä nii hään kõrran tii ja ühendüse maailmaga ku ka puhas ja rikas luudus.

Rahmani Jan

Kogokunnafestivalil maalsõva latsõ kunstnik Navitroll’a abiga pildi tuust, määne võinu olla Navi külä tulõvigun. Rahmani Jani pilt