2. hainakuul saiva koolikatsõ läbi timahavatsil Eesti Muusiga- ja Tiatriakadeemiä lavakunstikooli sisseastjil. Üts lavakalõ sisse saanu om Põlvan sündünü ja koolitiid alostanu Parhomenko Maara, kiä and’ mõni päiv päält sissesaamist Umalõ Lehele väiku intervjuu.
Kuis tull’ Sul huvi tiatri vasta?
Nigu pauk selgest taivast! Määnestki kimmäst alostuspunkti om mu tiatriarmastusõlõ rassõ löüdä: ütel aol seo lihtsäle tull’ ja inne ku viil arvogi sai, olli joba uma henge tiatrikuradilõ maaha möönü.
Määndse olli lavakooli sisseastmisõ katsõ?
Ekämuudu vahva ja põnõva! Verd oll’, hiki viil inämb ja pisarit vähembält vahtsõ Ülemiste järve jago. Hindamalda elokogõmus, soovita lämmäle!
Mis Sust nüüt edesi saa?
Looda, et ku ma suurõs kasu, saa must õnnõlik inemine. Kõik muu ammõdinimetüse omma seo tiitli kõrval tähtsüseldä.
Küsse Rahmani Elo
Värski lavakooli tudõng Parhomenko Maara. Viisitamõ Ere pilt
