Priinimel Hõrak om Eestin 128 kandjat. Vanan kiräviien kirutõdul priinimel Hõrrak om kandjit 17. Seod nimme om Eesti perekunnanimeraamadu jaos uurnu Uibo Udo. Ma kai edesi kavvõmbalõ aolukku, et kost tulõ talunimi.
Nimi panti Kanepi kihlkunna Erästvere mõisan 1809. aastagal kujul Hörrak. Taa tähendüs om küll selgele hõrak : hõraga (hõragu), eesti keelen üteldäs punane sõstar, a nime saaja – Horaka Reinu neli poiga, tütär ja naanõ – kanni inne nimepandmist talult saadut lisanimme, midä kirutõdi Horraga, Horräga, Horaka. Praavusk Roth kirut nime ümbre nii, et priinimi sai selge tähendüse. Talu nimi, paigapäälidsen pruugin Horakõ vai Horaka, ilmu vällä joba Roodsi aigu, ku 1688 kirutõdi Harraka Märt. 1758. aastagas oll’ lisanimi saanu kuju Horracko. Mille hariligust sõnast harak saad nimi pidänü är muutuma (har- > hor-), tuust om rassõ arvu saia. Vast om väega vana Horakõ nime takan iks määnegi tundmalda edenime mugandus ja ka Roodsi-aignõ kirutaja muutsõ nimme veidü, et olõssi arusaadavamb.
Päämidselt ommaki kõik nimmi Hõrak ja Hõrrak kandja oma nime saanu tuustsamast Erästvere suguvõsast, a üts eestistämine om sõski kah, 1936. aastagal Viimsi vallan võtsõ Apfelbaum vahtsõ nime Hõrak.
Perekunnanimel Sitik om Eestin katõssa kandjat. Rõugõ kihlkunna Viitinä mõisan panti Sittik selgele üten rian aiaviljuga nigu Plum ja Kürbis (Kirbits). Tan omgi tegemist tähendüsega ’sitikmari’, võrdlõ: eesti keele must sõstar. Viitinä nimi kuuli küll 19. aastasaa keskpaigan vällä.
Sittik panti ka Vahtsõliina mõisa Küläoro külän, kost läts lakja muialõgi, näütüses Urvastõ kihlkunnan pidäsi nimi vasta 20. aastagasaani.
Vändrä mõisan Pärnumaal panti Sittik kotussõnime Sitikuaru (Sittiko Arro) perrä. Popsikotussõ nimen võisõ olla tegemist kah mar’apuhmõ nimetüsega, kuigi põh’aeesti kiil tuud tähendüst tunnõ ei. Jääs üle tähendüs ’sitikas’ vai saksa keelest peri inemise lisanimi, miä oll’ kah Lääne-Eestin levinü. Saksa nimmi Sittig om tähendänü ’kombõlinõ’, ’papagoi’, a om olnu ka vana edenimi.
Perekunnanimi Sitik om antu ka 1921. aastagal Setomaal Saadserinna nulga Pattina külän, kost peri Jahim (Jefim) Sitik om mitmõ nime Sitik kandja esiesäs.
Saarõ Evar
Rubriigin kõnõldas perekunnanimmi periolõmisõst ja tähendüsest.
