Seol nimel om Eestin kandjit 311. Tartu- ja võrukeelitsel varjantsil Sipul om kandjit õnnõ katõssa. Vähä levinümb om Sippol 14 kandjaga, viil omma olõman Sippul (9) ja Sibbul (9). Seost nimest om Eesti perekunnanimeraamadu käsikirän kirutanu Kallasmaa Marja. Nimi panti umbõs 30 mõisan, minkast umbõs 26 olli Liivimaal, noist ummakõrda 11 Tartumaal.
Vanan kiräviien algkuju olli päämidselt Sibbul ja Sibbol. Selgele välläütlemise p-d näütävä nime Sippul ja Sippol olli Sangastõ kihlkunna nellän mõisan ja Vahtsõliinan. Keeni mõisan panti hingelugõmistõ Zipul [tsipul], tuu om sammamuudu nigu latgali keele sõna cibuls, poola cebula ja ukraina цибуля. Kerikligult sõski ts-ga nimme meil mitte kongi es kirotõda.
Võrumaa Sibula nimi sündü kuvvõn mõisan. Üts oll’ Harglõ Taheva, pere Savikõrdsi mant. Tõnõ oll’ Kanepi Hurmi mõisa, kon Sibula nime saiva Saia Saamo latsõ Ann, Jüri ja Mai. Poig Jüri vei ka nime edesi. Kolmas oll’ Võru mõisa, kon Navi ja Kääpä külän panti edimält Sibbula, joba pruukmisõn lisanime perrä. Üts Navi Sibulidõ poigõst läts’ küländ varra edesi Räpinä Veriora mõisa Vilustõ küllä, kon näide edimäst talukotust tundaski nimega Sibulamäe.
Nelläs kotus Võrumaal oll’ Vana-Antsla mõisa, kon nimi algkujul Sibbol panti põlitsõ Sibula talu perrä (Ähijärve lähkün) küländ suurõlõ suguvõsalõ. Viies kotus oll’ Vahtsõliina mõisa, sääl sai nime Sibbul õnnõ üts Rogosist sissetulnu pere Plessi külä lähkün Lissari külän, a nime Sippol suurõmb suguvõsa Hino ja Häärmäni külän.
Viil omma Rõugõ kihlkunna Sibula. Vahtsõ-Kasaritsa mõisan pand’ pastor Marpurg Sibula Jüri poja Piitre perrele väärnime Sibbul, a ildamb jäi näil iks vist pääle mõisan pant nimi Tamm. Tuu-iist Rogosi mõisan panti kimmäle Sibbul, õnnõ hingelugõmistõ 1826 kirutõdi viaga: Sibbal. Sõski või olla, et mõlõmba Rõugõ Sibula nime omma täämbädses vällä koolnu.
Sibula lisanimi Lõuna-Eestin om paiguldõ küländ vana, näütüses 1638 elli Rõngu Pühäste külän Sibbul Jürgen ja Vanan-Antslan Iiperä külän Zipul Tydt.
Inne ku suurõmbas nimmi eestistämises läts’, oll’ nimi Sibul joba 1934. aastagal keelunimekirja pant, tuud es tohe ilma mõjuva põhjusõlda võtta. Küll oll’ üts nimemuutminõ, kon Sibula asõmalõ võeti Sumerik.
Saarõ Evar
Rubriigin kõnõldas perekunnanimmi periolõmisõst ja tähendüsest.
