Seo nädälivaihtus peetäs üle kõgõ Rõugõ valla kodokohvikidõ päivi. Kokko võtt päivist ossa 20 kohvikut, kõik nä omma vallalõ 27. hainakuul ja osa ka päiv ildampa. Tego om «Tartu 2024» põhiprogrammi sündmüsega, mink hõigulausõ om: «Süük õks sünnüs söögi pääle.»

«Minevä aasta oll’ mi vallan Pärnapuu Sirje iistvidämisel kodokohvikidõ päiv Rogosi kandin, kon prooviti seo är,» seletäs päivi juht Kivistiku Maris. «Periselt omma kodokohvikidõ päävä, miä Hiiumaalt pääle naksi, üle Eesti väega populaarsõ ja egä vald taht umma päivä tetä. Inemise tahtva jaka ummi aiasaaduisi, tetä uma käe perrä süüke, näüdätä tuud, mis meil tan maal om. Ja inemiisi, kes liinan eläse, huvitas, miä maal om. Nimä käävä maal nigu muusõumin ja kaesõ maaello. Kodokohviku tetäs vallalõ tuuperäst, et jaka söögielämüst,» kõnõlõs tä.

Nii tegevägi seo puulpäiv Rõugõ valla esi paigun uma ussõ vallalõ 20 kodokohvikut ja egä kohvik om ummamuudu. «Om Eesti süüke, om Itaalia ja Lõuna-Ameerika süüke, om esi stiile, jahimehe kohvik – midägi kõikilõ. Om ka vaimsõ tervüse kohvik, kon saa vaimusüüki. Om klavõrimuusikat ja kunsti. Seo om tõsinõ kogokunnapido,» löüd kõrraldaja.

Rõugõ valla kodokohvikidõ päivi aigu om huviliidsil esieräline võimalus trehvädä Kangsti küläpidolõ, kon ast üles simmanibänd Kõhukesed. Et üts kohvik om hinnäst pidoplatsilõ vällä kuulutanu, om pidogi kodokohvikidõ päivi kavva saanu. Kodokohvikidõ päivi kõrraldas tsihtasotus Rõuge Valla Turism.

Rahmani Jan

Rõugõ valla kodokohvikidõ päivi projektijuht Kivistiku Maris. Rahmani Jani pilt