Hummõnidsõst saa Võro keskliin tsebimist täüs: nakkas pääle järekõrran 29. perimüstandsu festival. Timahavanõ folklooripido kand päälkirja «Kirivüs» ja kirriv om festivali kava külh.

Päält tandsuetendüisi kaemisõ, uulidsatandsu ja tandsuopitarri saa tetä üten jutujalotuskäüke, kullõlda lõõdsamängjide võikimängmist, ostõlla söögiuulidsa ja käsitüülaadu pääl. Kavan om hulga kontsõrtõ, ülesastjidõ nime kõnõlõsõ hindä iist esi: 5Miinust x Puuluup, Trad.Attack!, Lonitseera, Jaan Pehk ja Naised Köögis. Kõik umaette pärli.

Üle mitmõ aastaga tulõ seokõrd festivalilõ jäl hulk ülesastjit vällämaalt: Ameerigamaalt, Tšehhist, Montenegrost, Slovakkiast, Norrast, Belgiast ja Lätist. Vällämaa rühmi kõrraldaja Koobi Anu tõi vällä perimüspido arvada kõgõ perimüslikumba rühmä – montenegrolasõ. Kuulda ei pruugi nä esiki pille, tandsurütmi hoitas tõisi hellega. Tõõsõs nimmas’ tä Norra rahvamuusõumi tandsurühmä, miä om aastit uma maa nuuri norra rahvakunstiga tutvas tennü, näide siän ka kuningaperre liikmit.

Tuu, et festivalil om seokõrd küländ noorõnõ palõ ja esinejide siän hariligust inämb nuuri, märkse är ka programmijuht Mähari Kadri. Tuu and kõrraldajilõ hää tundõ, et festival om väke täüs ja tedä jakkus tulõvas aoski.

Mähari Kadri ütel’ viil, et timahava piäs kõik keskliinan liikja festivalimelust suurõmba vaivalda ossa saama: pääsündmüse sünnüse Vabadusõ ja Keskliina platsi pääl. Säält löüd ka latsilõ põnõvust pakva perimüspargi, kon näüdätäs talolatsi suvõao tegemiisi ja saa ka vannu käsitüüvõttit uudista. Õdaguidsil muusikaliidsil olõngiil Võro keskliinan saa kõik seo festivalirahvas kokko, et perimüsmuusiga perrä tandsu lüvvä.

Kabuna Kaile

Võro perimüstandsu festivali kõrraldajidõ kamp nätäl inne folgipito Võro Keskliina pargin päivä vällä meelütämän. Kabuna Kaile pilt