Ku su suvitsist läbielämiisist om viil üts umanäolinõ roitõlõminõ puudu, sis saat seo no är tetä. Jäänü om viil kolm etendüs-matka «Ääremaastikud» – 9.–11. põimukuul. Seo om kogokundlidsõlõ luudu põnnõv ja ettekujotõt maastigutiatri-matk, midä tetäs Piusa jõõ ürgoron Eikellegimaal.

«Ääremaastike» tiatritrupi laemb tsiht om luvva kogokunda, tuvva kokko ütesugumadsõ ilmakaemisõga inemiisi ja saia tähelepandmist Lõunõ-Eesti kiriväle ökosüstemile ja maastigulõ. Etendüse sisukäük om luud tüütarrin kunstnigõ, käsitüüliisi, näütlejide ja kliimaspetse kuuntüün. Ette naksimi taad valmistama jo keväjä varra: peimi mõttõtalgit, laagrit tulõ veeren, telksemi ja matkassimi luudusõn.

Seo om üts mõtsateraapia vorm, kon saat hindä seest auru vällä laskõ, hõngu haarda ja luudusõga süvembät ütisüst tunda. Maastigutiatri vii sinno nii luudusõ rato pääle ku su hindä sisemäidsi maastigõ pääle rändämä.

Samal aol, ku Lätin olli suurõ üleujotusõ, teimi mi pruuvi. Ka Piusa jõõ vesi oll’ hariligust mitu kõrda korõmb ja muido kinä matkarada muutu kõrraga mässäväs dþunglis, kon paduvihma käen jõõst üleminek latsiga, kedä vesi tahtsõ üten haarda, muutu tõõlidsõs seigelüses. Täämbädses om edimäne läbimängmine kaejidõga tettü ja vastakaja om olnu väega hää. Tuuperäst, ku tahat füüsilidselt mõnusat välläkutsõt äkiliidsi mäkke nõsõmiisi ja mäest allaminekidega, jõõst üleminekit, elävät muusikat, tandsu, laulu, meditiirmist, sis trehvämi Eikellegimaal.

Lumiste Kati

Kiränik Lumiste Kati and värskit mõttit,
kuimuudu egäpääväello vaeldust löüdä ja märgotas tuust, miä parasjago süäme pääl.