Leevi puut nakkas silmä esierälidse kauba ja julgõ umakandi keele pruukmisõga. Puuti hoitva joba säidse aastat käügin paigapäälidse ettevõtja inemise.

Ku 2017. aastaga jaanipäävä aigu Coop Leevil poodi kinni otsust’ panda, võti säidse paigapäälist tegüsät inemist hinnäst kokko ja tei paari nädäliga poodiussõ jäl vallalõ. Parhilla tüütäse poodin juhataja Raudsaarõ Eneken ja müüjä Nuusbergi Olga.

Poodirahvas kõnõlõs, et talvitsõl aol om poodin peris rahulik, a suvõ poolõ käü läbi hulga turistõ, suvitajit ja muido läbisõitjit. Suurõmb huuaig nakkas pääle mahlakuu lõpun Võhandu maratoniga. Tuu om päiv, ku poodist käü läbi kõgõ inämb rahvast. Poodirahvas valmistas tuus pääväs mitu nädälit ette.
Seo suvi mängiti Leevil näütemängu ja tuugi tõi poodi rahvast täüs. Poodirahva sõnno perrä omma inemiisi käest saadu kitmisesõna õkva nuu, miä avitasõ puuti pitä. «Ku olõt pooditüüst väsünü, and ostjidõ hää sõna jõudu mano,» kõnõlõsõ nä.

Leevi külän eläs umbõs 200 inemist. Uma küläpuut om tähtsä maaelo hoitja, kogokunna infopunkt ja kuunkäümise kotus. Lisas poodilõ om saman majan viil tõpratohtrõ vastavõtt, Smartposti pakipunkt ja Omniva kiräkast.

Päält söögikraami või Leevi poodist löüdä autokaupu, kalavarustust, paigapäälist käsitüüd, tüürõivit ja muud. Kaubavalik om vällä kujonu ostjidõ suuvõ perrä. Üts põnnõv asi om Leevi poodin viil: tan ei pelätä umma kiilt kõnõlda ja vällä näüdätä. Nii omma poodirahval sälän umakeelitside kirjuga hammõ ja poodi kassatšeki omma kah esierälidse.

Rahmani Elo

Juhataja Raudsaarõ Eneken ja lustilinõ müüjä Nuusbergi Olga Leevi poodi ussõ pääl. Rahmani Elo pilt

Leevi poodi müüjil omma sälän esisugumaidsi uman keelen kirjuga hammõ ja poodi kassatšeki pääl om kinäste umma kiilt tarvitõt.