Seol nimel om Eestin 390 kandjat. Nimi panti 14 mõisan Liivimaal ja nellän mõisan Eestimaa kubõrmangun.
Võrumaal panti priinimi Mürk säitsmen mõisan. Kanepi Erästvere Magari külän panti seo joba 1809. aastagal, 1826. aastagas oll’ nimi levinü ka Piigandilõ. Vanan-Antslan (Urvastõ) olli nime saaja Pärsimäe talust. Kaagjärve mõisan (Karula) olli nä Mürgi küläst, küläle alussõ pandnu Mürgi veski nimi oll’ olõman 18. aastagasaa lõpun, a viil varõmb – 1723 – elli Mürcke Paltzer mitte kavvõn Karula mõisa keskosan. Saru mõisan (Harglõ) panti Mürk Uskuna talun. Vana-Roosa mõisan (Rõugõ) panti Mürk Mõtstagalt peri ütsikulõ noorõlõ mehele. Täämbäne Mürgü nimi näütüses Krabil ja Peräjärvel om sõski peri Vanast-Antslast, kost nimekandja edimält Viitinä mõisalõ vällä rändsivä. Pindi mõisan panti Mürk Rusima külän, Orava mõisan Tabinilt peri mehele Kahkva külän.
Mulgimaal panti Mürk Laatre ja Vana-Kariste mõisan. Sangastõn panti Mürk Vaalu ja Pringi mõisan, lisas keriklikult viil Keeni mõisan, perrele, kiä hingelugõmisõn om priinimega Hindrikson. Tartu-Maarja Vorbusõ mõisa Rähni talun nime saanu Jüri Mürk liiku edesi Päidlä mõisalõ (Otempää). Huvitav om timä lisanimi, kirja pant vahtsõn elukotussõn: Luitseppa Jürri. Sõna luitsepp vai lüütsepp tähend tuudaigu ’lukksepp, väikeisi asju sepp’.
Sõna mürk päämäne tähendüs 19. aastagasaa Lõuna- ja Kesk-Eestin ollegi ’teräs’, mitte ’kihvt’. Illus näüde tulõ vällä Vana-Põltsamaa mõisa Paduvere külä Terase taludõn pantuist nimmist Terras, Mürk ja Taël (keriguraamatun Taal). Viimäne om saksa lainsõna, miä tähendäs kah ’teräs’. Kõikilõ kolmõlõ perrele tahetigi panda sama tähendüsega nime.
Sõna mürk inemise kottalõ om tähendänü ka ’kõva, kangõ, pikkä kasvu, vähädse jutuga, vihanõ’. Rahvaluulõn om levinü miis ku mürgütükk, miä tähendäs õigõt, kõvva, mehelikku miist.
Nimme Mürk panti mõnõ kõrra ka Virumaal. Sääl võisõ olla päämäne tähendüs ’kihvt’, nii nigu om eesti kirjakeele mürk ja soomõ myrkky tähendüs.
Nimme Mürk panti ka 1921. aastagal Petserimaal, kolm kõrda. Eestistämisel muudõti nimes Mürk Villändi mõisa nimi Mädamürk, katsiknimi Oinas-Mürk, lisas viil Bersin, Möller, Rothberg ja Sklave.
Saarõ Evar
Rubriigin kõnõldas perekunnanimmi periolõmisõst ja tähendüsest.
