Hää lugõja ja kirotaja! 20 aastakka om peetü Uma Lehe jutuvõistlust. A egä kirätüü om esieräline ja tähtsä, tuuperäst proovimi timahava tsipa veidemb võistõlda ja rohkõmb ütenkuun tettüst rõõmu tunda. Kuulutami võistlusõ asõmõl vällä Uma Lehe jututalgo!
Ku teil om rahvalõ kõnõlda mõni põnnõv, lustilinõ vai hallus jutt, saatkõ tuu Umalõ Lehele! Talgoliidsilõ omma ette nättü tunniskirä ja väiku avvohinna. Vällä valitas ka parõmba talgotüü ja hulk häid juttõ trükütäs 2025. aastaga joosul lehen är. Innekõkkõ oodami kirätöid, miä passisõ lehe perämädse küle pääle, a saata või ka eloliidsi märgotuisi.
Talgojuttõ sordi:
1. Periselt elon juhtunu nal’alinõ vai tõsinõ lugu
Lugu, miä om olnu kas nal’alinõ, oppusõga, saatuslik vai muido ummamuudu. Võinu olla periselt sündünü.
2. Lugu, midä periselt es juhtu
Mõnõ luu omma tegünü inemise pää seen: nättü unõn vai mõtõldu edesi määndsestki juhtunust as’ast, kuimuudu olõs võinu olla. A lugu om jo iks olõman, kasvai kirotaja pää seen. Peräkõrd om hää lugu?
3. Vikurvänt
Mõni inemine õkva om sääne, kiä mõist egäl puul ja egä as’a man määndsegi viguri tetä. Võiolla tä ei plaaniki vigurilinõ olla, a ummõhtõgi trehväs nii, et kõik, miä tä ette võtt, saa viguridsõ maigu mano. Säändsist vikurvändust, kuraasi täüs tegeläisist ja näidega juhtunust mi seokõrd juttõ oodamigi.
4. Kunsti pututus
Innekõkkõ tasos märgota kujotavast kunstist (maali, tsehkendüse, skulptuuri, fotokunst, uulidsakunst, installatsiooni, kihämaalingu, tätoveeringu jne). Olõ-i tähtsä, kas tego om elokutsõlidsõ vai as’aarmastaja loominguga. A ku om tahtmist, või kirota ka laemban tähendüsen kunstist, miä om kirotajat sügävähe pututanu.
Teema om vällä paknu Eesti Rahvaluulõ Arhiiv.
Inne luu kirotamist lugõgõ läbi seo oppus:
Egä inemine või saata talgolõ kooni viis juttu. Jutt piät olõma kirotaja hindä luudu ja ei või olla inne mõnõn tõsõn lehen vai raamatun är trükit ega internetti üles pant. Lugu võinu olla mõistligu pikkusõga, mitte pikemb ku üts arvudilehekülg (3500 tähemärki, 700 sõnna). A või ka lühembä jutu kirota.
Egä jutu mano kirotagõ kimmähe uma nimi, aadrõs ja telehvoninummõr! Ku tahati, et lehen trükitäsi ti tõnõ (vällämõtõld) nimi, kirotagõ tuu suuv eräle luu lõppu.
Jutu saatmisõga and autor Umalõ Lehele õigusõ tuud lühendä, toimõnda, lehen ja internetin avalda.
Oodami juttõ nikani ku 22.11.2024. Jutu pallõmi saata e-kiräga info@umaleht.ee pääle vai postiga Uma Leht, Tarto 48, 65609 Võro liin. Tunnissõna: jututalgo.
Terävät sulgõ!
UL
