Eesti käsitüü maja näütüisitarõn saa kooni 14. rehekuu pääväni nätä võrokõisi käsitüünäütüst Vana-Võromaa väekirjust. Näütüse süämes omma Rõugu kihlkunna pidolidsõ saisurõiva, nigu näid kanti 19. aastagasaa lõpupoolõ. Rõiva omma tettü muusõummõ varaaitun hoiõtuisi vannu rõividõ perrä.
Rahvarõividõ värmi ja kirä omma käsitüümeistride käe läbi ilostaman-ehitelemän täämbädse päävä asju: pruntsõ, kampsõ, kübärit, sukkõ, rätte, eski lapõst tettüid tekke. Umma käsitüüd omma näütüsele andnu Rosenbergi Dagmar, Viksi Heli, Einla Keiu, Tanni Liilia, Bergmanni Karille, Suvi Piia, Pedäjä Reet, Oja Vilve, Niiliski Virve.
Eesti käsitüü maja om Tal’na vanaliinan Pikk uulits 22. Maja ussõ omma vallalõ hummogu kümnest õdagu kellä kuvvõni (pühäpäävä viieni).
UL
Pilt käsitüünäütüse pidolidsõst vallalõtegemisest, miä oll’ 24. süküskuu pääväl.
