Seo lugu om peri mu esä jutust ja oll’ umal aol perekonnalegend. Põrõlt om lugu levinü laembalt.
Mu vanaesä Leo oll’ Võru kohtukirutaja. Tuud amõtimiist oll’ hirmsalõ vaia, kuna nika aastani 1900 (umbõs) olli kõik tunnistusõ kirjän võru keeli (põlisrahva keeli). Kohtukirutaja pidi mõistma noid eesti kiräkiilde ümbre panda. Meelega mõista pidi kirutamine ja lugõmine täl mõlõmban keelen vabalt ja soravalt vällä tulõma. Säändsiid mehi es olõ tuukõrd eriti pall’u.
Vanaimä Marie Pulk (neiupõlvõn Jauk) oll’ peri Krabilt keskmise suurusõga talust, midä sugulasõ edesi piti (pidävä siiämaani). Ütskõrd tetti talun jõulus hulga verivorstõ ja viidi liina Marie perrele kah. Talun tettül verivorstil om hää aura ümbre, tuukõrd toda inämb. Kohtuherrä tulli sis mu esäkodu kokku, et avita pererahval vorste häötädä – teedäki mille kõrvalõ.
Kohtun tüüt’ tolaigu ka miis nimega Kukk, kelle ülesandõs oll’ ammõtlikkõ kirju müüdä liina adressaadilõ kätte toimõta. Kukk lahend’ uma ülesandõ nii, et and’ kirjapaki mu esä (sündünü 1915) kätte ja pääle ülesandõ täütmist and’ esäle 5 kopikat. Tundu nigu väega väiku summa, aga esä tõend’, et tuu iist sai timä osta hindäle leevä ja tsukru, nii et nälläsurm es ähvärdä. Kukkõ pidäsi tä hindä kõgõ parembas sõbras.
Ku nüüd kohtuherrä pudelist ala võttiva ja vorsti pääle hauksiva, pand’ esä tähele, et Kukk haukas vorsti eriti suurõ suuga. Vorst nakas’ joba otsa saama ja otsakabõl tükke Kukõlõ suuhtõ. Esä sis hoiat’ umma sõpra: «Kukk, kae, et sa kapla alla ei neelä!»
Võiti ette kujuta, kuimuudu reagiirse toolõ latsõ häätahtlikulõ märkusõlõ (puul)purjun seltskond. Ja paari tunni peräst terve Võru liin. Tuukõrd oll’ Võru nii parajalt väiku, et kõik tunsõva kõiki. Kuna liina pääl liigusõ jutu pehmelt üldä mitte väega täpsele, sis tiise inämbjagu inemiisi, et Kukk oll’gi tuu vorstikabla alla niildnü. Käüti tälle kõtuvalu rohtu soovitaman ja muidu kaastunnõt avaldaman. Meelega mõista, et Kukk sai pikäpääle vihatsõs.
Siiämaani om alalõ ütelüs, ku kiäki midägi väega aplalõ süü: «Kukk, kae et sa kapla alla ei neelä!»
Pulga Jaan
