Nigu joba aastit kombõs, peetäs timahava kah märdikuu edimädsel täüsnädälil võro keele nädälit. Võro keele nädäli tegemiisi võtt iist ja tsusk takast Võro instituut.
Timahavadsõ nädäli lõugahus om «Püsümi võro keele pääl». Võro instituudi direktri Kuuba Rainer seletäs timahavast hõigulausõt vallalõ niimuudu: «Keele häöse är, ku inemise otsustasõ, et nä vahetasõ umma kiilt, nakkasõ kõnõlõma määnestki tõist kiilt ja tegevä tuud latsiga kah. Ku mi tahami latsilõ võro kiilt edesi anda, sis piät mõtlõma tollõ pääle, et tulõgi püssü võro keele pääl.»
Et võro kiilt saanu inämb latsilõ edesi anda, om suur jago keelenädäli tegemiisi köüdet latsiga. Võro keele nädälit tähistedäs mitmõn Vana-Võromaa koolin ja latsiaian, päält tuu saava latsõ kävvü mängutunnõn, midä mitmõ vidäjä iist võtva. A om hulga säändsit tegemiisi, minkast suurõ inemise kah ossa saava. Keelenädäli ettevõtmiisi om plaanit mitmõn paigan, nii Vanal Võromaal ku ka kavvõmbal.
Päält välläkuulutõdu tegemiisi saa egäüts esi kah võro keele nädälit tähistä. «Kutsumi kõiki üles võro keele nädäli puhul pruukma rohkõmb võro kiilt. Ka nuu, kiä harilikult ei olõ võro kiilt kõnõlnu, võinu iks rahulikult võrokõisi lipu vällä panda ja kõnõlda võro kiilt nii pall’o, ku vähägi mõistva vai saava,» löüd Kuuba Rainer.
Rahmani Jan
Mängutunnõ latsilõ vidä tõisi hulgan Põlva kihlkunna folkloorirühm Käokiräs. Pedäjä Birgiti pilt
Nädäli tegemiisi:
Võro liinan
Mängutunni latsilõ Võro instituudi saalin. 4. märdikuul kell 10 vidä tunni Lepassoni Kadri, 5. märdikuul kell 10, 11 ja 12.30 omma tunni Laube Kadriga, 6. märdikuul kell 9.30 ja 11 (latsiaialatsõ) ja kell 12.30 (koolilatsõ) tunni Mähari Enega, 7. märdikuul kell 10 ja 11 folkloorirühmäga Käokiräs.
6. märdikuu õdagu kell 18 om Võro instituudi saalin võrokiilne ja -miilne mälomäng, mink teema pututasõ Vanna-Võromaad, tuu inemiisi, aoluku, kultuuri, kiilt, luudust jm.
10. märdikuul kell 15.30 näüdätäs Võro Kandlõ kultuurimajan ülesvõtõt 1. hainakuul Põlvan peetüst Umast Pidost. Pilet 5 eurot.
Põlvan
8. märdikuul kell 18 om Põlva kultuurikeskusõn timahavadsõ Uma Pido ülesvõttõ näütämine. Väiku kokkovõttõ tege pido lavastaja Leesalu Diana ja lauluhelü võtt üles pido päädirigent Joosingu Küllike.
Varstun
5. märdikuul kell 18 tulõ perimüstandsuõdak Varstun Kõrvipalu luumistalun. Ilmast ja inemiisist kõnõlõs Kõivupuu Marju, tandsus mängvä Mõnistõ kooli muusigapesä ja Mooste pilliklubi. Pilet 5 eurot.
Räpinäl
7. märdikuul kell 18 om kultuuriõdak Räpinä luumismajan. Näüdätäs Laanõ Triinu vahtsõt raamatut «Poiss ja papa», Säinasti Ene luulõkoko «Lumõkibõna» ja Saarõ Evari luulõkoko «Tsirgukiil». Kalla Urmas kõnõlõs Räpinä kandi keelest ja Saarõ Evar priinimmist. Muusikat tege Ilvese Aapo.
Tarton
6. märdikuul om Jakobi 2 ruumin 427 võro nuuri ja vannu keelekohvik.
Tarton Tammõ gümnaasiumin om võro keele sündmüisi iispääväst riidini. Tõisi tegemiisi siän om Kalkuna Mari kontsõrt.
Internetin ja muial
Vahtsit umakeelitsit juttõ saa kullõlda helüait.ee lehe päält. Lisas om võro keele nädälil kodolehe lasteekraan.ee pääl võrokeelitsit juttõ.
Tsipa inämb saa võro kiilt kuulda ka Vikerraadiost.
Võro keele nädäli kavva saa kaia Võro instituudi kodolehe wi.ee päält.
