Nimel Kelt om Eestin 60 kandjat. Vanan kiräviien varjantsil Keldt om kandjit kümme. Nimi panti nellän kotussõn.
Tartumaal Suurõ-Rõngu mõisan panti seo nimi Raigaste külä Keldu (Keldo) talun. Keriguraamatun kirutõdi edimält Keld, hingelugõmisõn Keldt. Nimi läts õigõ piä edesi Aagrõlõ, kon pruugiti joba kiräpilt Kelt. Väiku-Rõngu mõisa Meemaste ehk Tilga külän panti taasama nimi, kiräpilt oll’ algusõst pääle Kelt. Inämbäste om Rõngust edesi lännü Suurõ-Rõngu peritoluga nimi.
Võrumaal panti Kelt Põlva kihlkunna Kähri mõisa Karilatsi jaon, mitman talun. Nä olli peri Karilatsi Juuriku (Jürikesse) küläst. Karilatsi Tros’a külän om täämbägi Keldo talu.
Tõnõ Võrumaa kotus oll’ Rõugõ kihlkunna Vana-Kasaritsa mõisa, kon Kelt panti Vadsa külän, üte peremehe ja timä viie poja perrilõ. Ka sääl om täämbä olõman Keldo talu, naabrusõn Meeliku külän.
Umastava käände kujul priinimi Keldo (32 kandjat) ja Keldu (15 kandjat) paistus olõvat peri õnnõ ütest kotussõst. Tuu om Urvastõ kihlkunna Liinamäe mõisa. Nime Keldo saaja ellivä Vorsti talun ja Lümätü külä Kähri talun (tuu Kähri talu maa võeti umbõs 1850 Lümätü kar’amõisa maas, talu kattõ är). Nime saajidõ ütine vanaesä oll’ Lümätü külä Kähri vai Kääri Piitre (personaalraamadun 1762 Kähri Peter).
Ütengi paigan, ka Suurõ-Rõngun olõ-i Keldo lisanimi väega vana. Taad nimme tulõ ette viil näütüses Vahtsõliina Kõokülän, kon om Keldo talu, ja Kanepi kihlkunna põh’aõdagunukan, kon om Tammõ mõisa Keldu talu ja Keldu järv. Arvada omgi taa lisanimi tegünü lõunaeesti sõnast kelt, umastav keldo vai keldu, miä tähendäs kuivatut kalla. Ludsi keelesaarõ keelen üteldi ka kält ja kõlt, näütüses ütlemine: nii pall’o ku käldul kiilt, nii pall’o havvõl miilt. Et keldukalaga om võrrõld ka kokkukuiunut inemist ja esiki kõhna eläjät, sõs om arvu saia, mille taast sõnast om talupoja lisanimi saanu.
Eestistämisel üteldi nimest Kelt vallalõ 12 kõrral, asõmalõ võeti Keldoja, Maasikmäe, Rohtlaan ja Saarepuu Karilatsin, Kaldmaa, Kaseoja ja Mäeväli Kasaritsan, Kalde ja Kell Võnnun, Laidre Haapsalun, Lehis Taeblan ja Väljak Tartun. Nime Keldt asõmalõ võeti Raid ja Vood Tal’nan.
Saarõ Evar
Rubriigin kõnõldas perekunnanimmi periolõmisõst ja tähendüsest.
