Vahtsõs Võro instituudi direktris valitu Padari Ivari luut, et timä pikäaolidsõ kogõmusõ poliitikan ja hää Võromaa elo tundminõ avitasõ härgütä suurõmbat kuuntüüd esi asotuisi ja Võromaa perride vaihõl.

5. märdikuul valõ Võro instituudi tiidüsnõvvokogo järgmädses instituudi direktris Padari Ivari. «Paar kuud tagasi mul viil es olõ plaani kandidiiri, a oll’ inemiisi, kes mukka tuud asja arotiva ja ma andsõ paprõ sisse,» kõnõlõs tä.

Padari Ivari löüd, et Võro instituut, miä om tegotsõnu pia 30 aastakka, om avitanu mikandi kiilt ja kultuuri kõvastõ edesi, innekõkkõ om nõsõnu keele ja kultuuri avvu seen hoitminõ. «Umal aol oll’ pall’o säändsit inemiisi, kiä olli koolin võro keele kõnõlõmisõ iist nukka pantu, ja tuuperäst olli nä ka seo keele avaligu pruukmisõ man vastalidsõ. A ao joosul om taad põlvkunda, kiä umma kiilt ja kultuuri tähtsäs pidäse, mano tulnu. Kasvai mu uma nelä- ja kuvvõaastanõ latsõlats omma väega kõva huvilidsõ taa keele vasta. Mul om küpär põlvini noidõ inemiisi iin, kes taad asja siiämaani omma vidänü.»

Uman vahtsõn ammõtin pidä Padari Ivari tähtsäs, et inemise, kiä võro keele tegemiisi iist võtva, saanu umma tüüd edesi tetä. Lisas luut tä inämb härgütä kuuntüüd tegemä paiklikkõ muusõummõ, kuulõ ja latsiaidu, umavalitsuisi ja perrit. «Jumala abiga olõ ma nii võro keele ku ka muusõumihuvilinõ. Meil omma avvolidsõ muusõumi, kes tegevä kimmäst tüüd, ja nuu tiidmise, miä muusõummõn omma, võinu inämb jõuda mi kooli- ja latsiaialatsini,» seletäs tä.

«Üts asi, mis pututas viil Võro instituuti, om mi kandi positiivnõ müügikõrraldaminõ. Võromaa turundamisõ luku tulõ aia, tuust piäs kõik arvo saama, üten arvadu eräettevõtja,» märgotas Padari Ivari viil esi tegijide kuuntüüvõimaluisi pääle.

Laembalõ Võromaa täämbädse elo pääle märken löüd tä, et hädä omma mikandin sama miä egäl puul muialgi. «Liinahtuminõ om üleilma hädä, maapiirkunna tükise hõrrõmbas jäämä. A Võromaal om hulga noid kah, kiä omma siiä tagasi tulnu. Võromaa vaimsus om peris hää, kimmämbä palgaga tüükotussit pidänü õnnõ rohkõmb olõma.»

Ja kuigi maailman om aig, ku rohkõmb kõnõldas sõast ja rahust, pidä Padari Ivari kultuuritegemiisi väega tähtsäs. «Leeväpalakõnõ või olla suurõmb vai väikumb, a kultuur om tähtsä, taa om kõgõ elo vundament,» löüd Võro instituudi järgmäne direktri.

Rahmani Jan

Võro instituudi järgmädses direktris valitu Padari Ivari. Rahmani Jani pilt