Om ammu teedä asi, et novvembrit nimmatas viil märdi- ja katrikuus, hallakuus, külmäkuus, miihikuus, kosjakuus. Om teedä tuugi, et novvembri edimäne täüsnätäl om võru keele nätäl. Tuuperäst oll’ Tal’nangi harilikust inämp kuulda võru kiilt.

Tal’na võru seldsi inemiisi ülesastmisõ keelenädälil olli säändse:

• Iispäävä, 4. märdikuul hõigas’ Pedassaarõ Ele ETV «Aktuaalsõ kaamõra» ilmateedüst uman imäkeelen kah.

• Tõõsõpäävä, 5. märdikuul oll’ mi seldsi kultuuriministri Plumanni Kaja-Riina Poska uulidsa vannu inemiisi hindäabi- ja nõvvuandmisõ ütisüse majan võrukeelidse luulõ-etteastõga.

• Kolmapäävä lugi Müürsepä Külli Haabersti pääväkeskusõn eestläisile ette Umma Lehte.

• Pühäpäävä, 10. märdikuul tekk’ tiatritrupp Tungõl Sakala 14 kultuuriseltse majan etteastõ «Kreutzwaldi tii Kalõvipujani».

A nädäliga mi tegemise viil es lõpõ, ollimi uma võru keele ja kultuuri kitmisega huu sisse saanu. 21. märdikuul oll’ Kadrioro raamadukogon võru keele kohvitarõ, midä vidi Orioni Jana. Ja Liisoga teimi 27. märdikuulgi üte kõva kontsõrdi.

Tuust perämädsest etteastõst and kullõjidõ poolõ päält ülekaehusõ Paevanana tunnõt emeriitprohvesri Einasto Rein. Tedä om kirätüü man avitanu Kolditsa Maie, kiä saisõ kontsõrdi aigu Liisodõ rivin.

Müürsepä Külli