Timahavanõ Kärgula valla aoluusõpru klubi iist veetü vabariigi aastapäävä matk, miä peeti 22. radokuul, vei huvilidsõ Kurõnurmõ kanti. Kokko tull’ seokõrd matkama 66 inemist ja üts pini.

Kurõnurmõ keskliinan vei matkaliidsi tii inneskidse koolimaja mano, kon kõnõldi paigapäälidse kooliharidusõ aoluust. Edesi minti poodimaja mano, minkast täämbädses om alalõ õnnõ vundament, ja kõnõldi Kurõnurmõ kaubandusõga köüdetüist esieräliidsist juhtumiisist. Säälsaman kõrval tetti piätüs viil raudtiijaama man ja silmäti üle nurmõ mõtsavahikotust.

Keskliinaga tutvas saanu, läts’ matkarahvas pikembä tsõõri pääle. Peris pikäs vinnüvä roduga jõuti Kandsimäe mano ja kõnõldi Kurõnurmõ korgist mäkist. Edesi vei tii Polikarpusõ Viido mano Eesti edimäst pääväparki kaema. Pääväpargi mant kõnniti edesi mõtsavele Aunvere Antsu kodotalo mano ja kõnõldi juttõ sääl toimunuist veretöiest.

Ja sis veigi tii tagasi alostuspunkti Kurõnurmõ küläseldsi tarrõ. Tsipa külmänü matkalidsõ saiva kuntõ ülessulatamisõs lämmind hernesuppi ja tsäid ja väiku loengu küläseldsi tegemiisist.

Üts Võromaa paik sai niimuudu matkaliidsi jaos jäl tsipa tutvambas.

UL

Promvaldsi Marge pilt