Üteldäs, et imelikkõ löüd egäst rahvast ja kotusõst. Tuugiperäst jääse mõnõ as’a siinmail rohkõmp silmä ku muial.

Üts imelikumbit om tuu, kuismuudu inemise sõidukombõ muutusõ, ku tii om kas 1+1, 1+2 rita vai laemb. Hariligu suurõtii pääl om jo inämbähe lubat sõita 90ga. A millegiperäst mõnõ arvasõ, et sääl piät kimmähe 70–80ga sõitma. Midä rohkõmp vastatulõjit vai kurvõkõisi, tuud aigladsõmpa.

A ku tuusama juht saa laemba kotusõ pääle nigu 2+1 vai peris 2+2, sis kaos egäsugunõ piirdja peris är. Esiki ku ammõtlikult om sääl 90 vai 100 lubat. Tii om laemb jo külh, a ega tä sis viil niipall’o veidemb ohtlik ei olõ. Ma esi pruugi vähägi pikembä sõiduga kiirusõhoitjat ja tuuperäst jääse säändse juhi väega selgele silmä.

Tõnõ imelik kommõ om ette käändmiisi ja riavahetuisiga. Inemine käänd kõrvaltii päält säändse vungiga ette nigu kiirabi välläkutsõlõ. Hää külh, kõigil om vahel kipõlt vaia kohegi jõuda. A seletäge är, misperäst pääle säänest teko om aigu maailm ja kõlbas 70–80ga sõita? Riavahetuisi olõ-i kah vist pall’odõlõ koolin opat vai sis opati külh, a külge jäänü olõ-i. Päämidselt 2+1 ja laembidõ kotussidõ pääl ei olõ ummõtõgi vaia nii kipõlt tõisilõ nõna ette käändä. Om olnu õnnõtuisigi, kon sääne juht unõht’ är, et täl om peräkäro kah, ja käändse tõsõlõ külge vai tagomanõ juht inämp tiid es näe.

Mis lühkeselt võisi üteldä? Inemise, sõitkõ esi ja laskõ tõisil kah rahun sõita! Kaegõ ja mõtõlgõ umast nõnaotsast kavvõmbahe! Är tekku asjo, mida hindäle ei tahassi, et tetäs.

Orassoni Elmet