MTÜ Vana-Võromaa Käsitüü pand’ 17. radokuu pääväst käümä vahtsidõ kaupu ja meelüsside luumisõ konkursi «Silmäilo».
Seokõrd saa võistlusõ jaos luvva sändsit ilmkistumalda kinäsid asju, mink päält saa ai silmi är käändä, ja ku kaet, om hengel õkva lämmi. Silmäilo luuminõ and suurõ ja lagja vabahusõ, a sõski tulõ silmän pitä, et tetüs olnu Vana-Võromaa ja seo kandi kultuuriperändüsega köüdet. Märgotamisõ, pruuvmisõ ni valmistegemise aigu om üle katõ kuu, konkurss lõpõs mahlakuu lõpuga, võidutüü kitämi vällä lehekuu 8. pääväl.
Käsitüümeistre tegevä peris pall’o põnõvit asju, valikut om küländ, a õks om kuulda, et puudus om sändsist meelüssist, minkast om är tunda, et om Võromaa uma. Püvvämi egä aastak konkurssõ tetä, et ummamuudu kaupu riiolidõ pääl iks suurõmb valik olõs.
Seo aastaga konkursi teemavalikut mõot’ Eesti rahvakunsti ja käsitüü liidu aastagateema «Rahvarõivas kruudun», miä nõst viil kõrd püüne pääle mi rahvarõiva. Võtkõ no ette kaia Vana-Võromaa rahvarõivit, näide kirju ja värme, vast halgahtas säält mõtõ luvva midägi sama ilosat ja lumjat täämbäste päivä.
A ei piä sukugi õnnõ rahvarõividõ pääle kaema. Võrokõnõ om iks kõgõ luudusõst hindä ümbre löüdnü silmäillo ni matõrjalõ. Tii silmäilo puust, luust vai minkastki muust, olkõ vai kalanahast!
Linnaku sõs luuja mõtõ korgõlt ja olku käe virga mõttit asjus tegemä. Ilosit asju piät inemise ümbre iks olõma henge ülendüses ja silmi puhkamisõs. Saagu sändsit asjo sõs manu.
Konkursilõ anda passisõ tüü, midä olõ-i varramba vällä näüdät vai joba müümises tett. Tasos märki as’a paki pääle, selle et konkursilõ tuuduid asju saa edespiten anda müüki Vana-Võromaa Käsitüü esindüspuuti, e-puuti Uma Puut, laatu pääle, muusõumipuutehe ja näütüs-müükele. Nimmatulõ lisas um plaan näüdädä konkursitöid suvitsõl näütüsel Võro liina Ideekuan Vana-Võromaa käsitüüesindüsen.
Täpsämbäle saat konkursi tingimuisi kotsilõ teedä kodolehe ideekoda.ee/loovmeistrid päält vai Mol’oraamadu (FB) lehe päält: https://www.facebook.com/vanavoromaahandycraft.
Tinavaastanõ konkurss om kõrrast säitsmes, varramba om MTÜ Vana-Võromaa Käsitüü kõrraldanu vahtsidõ käsitüükaupu luumisõ konkurssõ teemadõga «Savvusann», «Aigu om!», «Mõtsa poolõ», «Kirjun om väke», «Latsõlik ja lustilinõ» ja «Minkastki midägi».
MTÜ Vana-Võromaa käsitüü
Timahavadsõ käsitüükaupu ja -meelüsside konkursi «Silmäilo» meelütüspildi om tennü kunstnik Margna Epp.
