Tulõva puulpäävä, 22. radokuul peetäs Põlva kultuuri- ja huvikeskusõ man lumõlavvaga hüppämise ja trikitegemise võistlust Mässer Hype!. Uuri lumõlavvaklubi Mässer vidäjä HELGANDI KARLI käest perrä, midä täpsempä tegemä naatas.
Mis klubi om lumõlavvaklubi Mässer?
Taa om Põlvast peri Eesti edimäne ammõtlik lumõlavvaklubi, luudu 1997. aastal. Aastidõ joosul om klubielo lainõtanu, a 2024. aastagast om vahtsõnõ juhatus ja naati jäl võistluisi pidämä.
Ku kavva võistlust Mässer Hype om peetü?
Mässer Hype oll’ edimält pidosari, a 2010. aastil peeti kolm aastakka säänest lumõlavvavõistlust. Sis oll’ 12 aastat vahet, a minevä aastak panti jäl võistlus pistü.
Seo aasta om muu võistlusõ man plaanin Põlva kultuurikeskusõ parklah lumõlavvatrikke tegemine Volkswagen Passati katussõlõ pantuisi torrõ päält. Kõgõ parõmba triki tegijä saa tuu auto perän hindäle avvohinnas. Lisas om tõisigi avvohindu. Päält võistlust om kultuurimajan peräpido, kon astva üles Valem Vale, kiä näütäs umma tõist stuudioalbumit, ja Chalice.
Mis teema Põlva rahval noidõ Passatitõga om?
No eks taa Passat om iks kõgõ Baltikumi auto olnu! Esieräline om taa tuu poolõst, et autol om 100liitrine kütüssepaak ja tuuga sai Vinnemaalt vai Valgõvinnemaalt odavat kütüst tuvva. Tuu äri sai mõni aig tagasi läbi, a et auto 1,9-liitrine diislimoodor kest väega häste, sis löüd taa ka täämbädsel pääväl tüüd.
Tuu Passat, mis mi klubi puult avvohinnas antas, saa tulõva aastaga joba 30 aastakka vanas, nii et om juubõl.
Lummõ om perämädsel aol veidü olnu. Kuis lumõlavvasõitja ummi sõitmiisi tetä saava?
Tulõ iks leppü tuuga, miä olõman om. Ku lummõ Ladina-Eestin ei tulõ, sis saa sõita Lõuna-Soomõn, kon om hulga mäekeskuisi. A ku ka Soomõn om pall’o suvinõ ilm, sis tulõ kaia Austria poolõ.
Mis and Sullõ jõudu säändsit asju kõrralda?
Mi püvvä tetä üritüisi, kohe esi kah tahtnu minnä. Tuu, ku sõitjilõ ja rahvalõ miildüs, andki jõudu asja edesi tetä
Küsse Rahmani Jan
Pilt mineväaastagadsõst lumõlavvaga hüppämise ja trikitegemise võistlusõst. Pilt Helgandi Karli pildikogost
